ភ្នំពេញ៖ នៅថ្ងៃទី៣ ខែឧសភានេះ ប្រតិភូកីឡា គ្រូបង្វឹក និងក្រុមកីឡាករ កីឡាការិនី មកពីបណ្តា​ប្រទេស​អាស៊ាន ប្រមាណ ៦៥០ រូបបន្ថែមទៀត បានអញ្ជើញមកដល់អាកាសយានដ្ឋាន​អន្តរជាតិ​ភ្នំពេញ ដើម្បីចូលរួមក្នុងព្រឹត្តិការណ៍ស៊ីហ្គេមលើកទី៣២ ​និងអាស៊ានប៉ារ៉ាហ្គេមលើកទី១២ ដែលកម្ពុជាធ្វើជាធ្វើជាម្ចាស់ផ្ទះ។

ប្រតិភូកីឡា គ្រូបង្វឹក និងក្រុមកីឡាករ កីឡាការិនីប្រមាណ ៦៥០ រូបនេះមានមួយចំនួនមកពី​ប្រទេស​ឥណ្ឌូនេស៊ី ឡាវ សិង្ហបូរី ប្រ៊ុយណេយ៍ដារូសាឡឹម វៀតណាម មីយ៉ាន់ម៉ា ម៉ាឡេស៊ី ថៃ និងហ្វីលីពីន និងកីឡាករ កីឡាការិនីកម្ពុជាជិត ៥០ រូបផងដែរ​ ដែល​បានបញ្ចប់ការ​ហ្វឹកហាត់​នៅក្រៅប្រទេស ​ក៏បានអញ្ជើញមកដល់កម្ពុជា ​ដើម្បីចូលរួមប្រកួតលើប្រភេទកីឡា ដូចជា កីឡា TEQBALL កីឡា PENCAK SILAT កីឡា JIJITSU គុនល្បុក្កតោ កីឡាហែលទឹក អត្តពលកម្ម កីឡាប្រណាំងកង់ Golf កីឡាប៉េតង់ ការ៉ាត់តេ E-Sport កីឡា Billiard Sports កីឡាវ៉ូវីណាម តេនីស តៃក្វាន់ដូ សីប៉ាតាក់ក្រ កីឡាប្រដាល់ ទ្រីយ៉ាថ្លុង កីឡាកាយសម្ព័ន្ធ កីឡា Arnis និងកីឡាបាល់ទាត់ផងដែរ។

បណ្តាប្រតិភូ និងក្រុមកីឡា បានថ្លែងការប្តេជ្ញាចិត្ត ក្នុងការប្រកួតដណ្តើមយកមេដាយ​ដើម្បីលើក​មុខមាត់​កិត្តិយស​ប្រទេសជាតិរបស់ពួកគេ ​ហើយក្រុមកីឡាក៏បានថ្លែងអំណរគុណកម្ពុជា ដែលបានទទួលស្វាគមន៍យ៉ាងកក់ក្តៅបំផុតចំពោះប្រតិភូកីឡា និងកីឡាករទាំងអស់។

បើតាមមន្ត្រីអាកាសយានដ្ឋានអន្តរជាតិភ្នំពេញ គិតចាប់ពីថ្ងៃទី២៤ ខែមេសា រហូតដល់ថ្ងៃទី៣ ខែឧសភា​ មានប្រតិភូកីឡា គ្រូបង្វឹក និងកីឡាករ កីឡាការិនី និងអ្នកសារព័ត៌មានបណ្តា​ប្រទេសអាស៊ាន ​ប្រមាណជាង ២៧០០ រូប​ ក្នុងចំណោមប្រតិភូ កីឡា អាស៊ានប្រមាណជាង ១២០០០ នាក់ ​គឺបានអញ្ជើញមកដល់កម្ពុជា​ ដើម្បីចូលរួមក្នុង ​ព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២៕ អត្ថបទ ស៊ុម សុខជា