ភ្នំពេញ ៖ រដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្ដរជាតិនៃប្រទេសជប៉ុន JICA គ្រោងនឹងចំណាយ​ទឹកប្រាក់ប្រមាណ ១៦៧ លានដុល្លារអាមេរិក សម្រាប់គម្រោងកែលម្អការតភ្ជាប់​ផ្លូវជនបទប្រវែង​ជាង៥០០គីឡូម៉ែត្រ​ដែលគ្រប់ដណ្ដប់លើខេត្ត​គោលដៅចំនួន៤ខេត្តក្នុងប្រទេសកម្ពុជា។

ក្នុងជំនួបសម្ដែងការគួរសម និងពិភាក្សាការងារជាមួយ រវាងឯកឧត្តមបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួង​អភិវឌ្ឍន៍ជនបទ និងលោក Sanui Kazumasa ប្រធានថ្មីរបស់ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) ប្រចាំនៅប្រទេសកម្ពុជា នាព្រឹកថ្ងៃ០៣ ខែឧសភា ឆ្នាំ២០២៣ នៅទីស្តីការក្រសួង បានលើកឡើងពី គម្រោង​កែលម្អការតភ្ជាប់ផ្លូវជនបទ ដែលរដ្ឋាភិបាលជប៉ុន តាមរយៈទីភ្នាក់ងារ​សហប្រតិបត្តិការអន្ដរ​ជាតិនៃ​ប្រទេសជប៉ុន JICA នឹងផ្តោតទៅលើការកែលម្អផ្លូវជនបទពីផ្លូវល្បាយក្រួសក្រហមទៅជាផ្លូវក្រាលកៅស៊ូពីរជាន់ប្រភេទ DBST និងផ្លូវបេតុង ដែលមានប្រវែងសរុប ៥២៩គីឡូម៉ែត្រ និង ៧០ម៉ែត្រ គ្របដណ្ដប់លើភូមិសាស្រ្តខេត្តចំនួន៤ រួមមាន ខេត្តកំពង់ឆ្នាំង ខេត្តពោធិសាត់ ខេត្តបាត់ដំបង និងខេត្តបន្ទាយមានជ័យ។ គម្រោងកែលម្អការតភ្ជាប់ផ្លូវជនបទខាង​លើនេះ គ្រោងនឹងចំណាយទឹកប្រាក់ប្រមាណ ១៦៧ លានដុល្លារសហរដ្ឋអាមេរិក ដែលមានក្រសួង​អភិវឌ្ឍន៍ជនបទ​ជាប្រតិបត្តិករ ។

លោក Sanui Kazumasa ប្រធានថ្មីរបស់ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) ប្រចាំនៅប្រទេសកម្ពុជា បានថ្លែងបញ្ជាក់ថា បច្ចុប្បន្ន JICA កំពុងពិនិត្យលើឯកសារសំណើ​សុំជ្រើសរើស​ទីប្រឹក្សាបច្ចេកទេសរបស់គម្រោងនេះ ដើម្បីងាយស្រួលដល់កិច្ចសហប្រតិបត្តិការវាងក្រសួងអភិវឌ្ឍន៍ជនបទ និងJICA កាន់តែប្រសើឡើង ។         

ក្នុងឱកាសនោះដែរ ឯកឧត្តមបណ្ឌិតសភាចារ្យរដ្ឋមន្ត្រីក្រសួងអភិវឌ្ឍន៍ជនបទ បានសំដែងការស្វាគមន៍ និងកោតសរសើរ ព្រមទាំងបានវាយតម្លៃខ្ពស់ចំពោះកិច្ចសហប្រតិបត្តិការរវាងភាគី JICA និងក្រសួងអភិវឌ្ឍន៍ជនបទ លើការរៀបចំ និងអនុវត្តគម្រោងកែលម្អការតភ្ជាប់ផ្លូវជនបទ ក្រោមហិរញ្ញប្បទានរបស់ទីភ្នាក់ងារ​សហប្រតិបត្តិការ​អន្ដរជាតិនៃប្រទេសជប៉ុប JICA ។ ឯកឧត្តមក៏បានជម្រាបជូន JICA អំពីយុទ្ធសាស្រ្ដ​សំខាន់ៗរបស់​ក្រសួង​អភិវឌ្ឍន៍ជនបទ ក្នុងការលើកកម្ពស់កម្រិតជីវភាពរបស់ប្រជាពលរដ្ឋនៅទីជនបទអោយមានភាពប្រសើរឡើង តាមរយៈការអភិវឌ្ឍន៍លើវិស័យហេដ្ឋារចនាសម្ព័ន្ធជនបទ សេវាសាធារណៈ ជាពិសេសផ្លូវជនបទ ដែលប្រៀប​បានដូចជាសសៃឈាមសេដ្ឋកិច្ចដ៏សំខាន់របស់ប្រជាកសិករ ជាឆ្អឹងខ្នងនៃសេដ្ឋកិច្ចជាតិ ដែលយគម្រោង​ខាងលើនេះនឹងរួមចំណែកក្នុងការសម្រេចឲ្យបាន គោលនយោបាយជាតិអភិវឌ្ឍន៍ជនបទ ២០២១-២០២៣ របស់ក្រសួង។ ជាមួយគ្នានេះ ឯកឧត្តមរដ្ឋមន្ត្រី ក៏បានថ្លែងអំណរគុណដល់ ​ទីភ្នាក់ងារសហប្រតិបត្តិការ​អន្តរជាតិនៃប្រទេសជប៉ុន (JICA) និងរាជរដ្ឋាភិបាលជប៉ុន ដែលកន្លងមកតែងតែជួយ​គាំទ្រព្រះរាជាណាចក្រ​កម្ពុជាលើការអភិវឌ្ឍន៍គ្រប់វិស័យ និងបានអបអរសាទរជូនចំពោះលោក Sanui Kazumasa ដែលបានទទួលតំណែង​ជាប្រធានថ្មី របស់ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) ប្រចាំនៅប្រទេសកម្ពុជា ៕ ដោយ ៖ សុជាតា