​ភ្នំពេញ​៖ ក្រុមហ៊ុន​អាកាសចរណ៍​Air Asia បាន​សហការ​ជាមួយ​សហភាព​សហព័ន្ធ​យុវជន​កម្ពុជា រៀបចំ​បិទ​ស្លាក​សញ្ញា Beyond the Games ស្លាក​សញ្ញា​ឡូ​ហ្គូ SEA GAMES​លើក​ទី​៣២ និង​ស្លាក​សញ្ញា សហភាព​សហព័ន្ធ​យុវជន​កម្ពុជា ស​.​ស​.​យ​.​ក លើ​យន្តហោះ Air Asia ពង្រីក​ការផ្សព្វផ្សាយ​ភាពជា​ម្ចាស់ផ្ទះ​របស់​កម្ពុជា​រៀបចំ​ព្រឹត្តិការណ៍​ប្រកួត​កីឡា SEA GAMES និង​ASEAN PARA GAMES​ទៅកាន់​មជ្ឈដ្ឋាន​អន្តរជាតិ​។​

​ឯកឧត្តម សុខ សប្បាយ​ណា ក្នុងនាម​ជា​ប្រធាន​ប្រតិបត្តិ​នៃ​យុទ្ធនាការ​BEYOND THE GAMES បាន​ថ្លែងប្រាប់​អ្នកសារព័ត៌មាន​នៅ​ថ្ងៃទី​៣ ខែឧសភា​នេះ ថា ការបិទ​ផ្សាយ​ស្លាក​សញ្ញា Beyond The Games ដែលមាន​រូប​បេះដូង នៅលើ​យន្តហោះ​អ៊ែរ​អេ​ស៊ាន គឺ​យើង​ចង់​ផ្សព្វផ្សាយ​បង្ហាញថា កម្ពុជា ប្រទេស​តូច តែមាន​បេះដូង​ធំ ហើយ​អាច​រៀបចំ​ព្រឹត្តិការណ៍​ប្រកួត​កីឡា SEA GAMES និង​អាស៊ាន​ប៉ា​រ៉ា​ហ្គេម ដែលមាន​ការទទួល​ស្វាគមន៍ ភ្ញៀវ​អន្តរជាតិ​គ្រប់​ជាតិ​សាសន៍​ប្រកបដោយ​ភាព​ញញឹម​រាក់ទាក់ និង​ចង់​ផ្សព្វផ្សាយ​វប្បធម៌​ស្រឡាញ់​សន្តិភាព​របស់​កម្ពុជា ទៅកាន់​មជ្ឈដ្ឋាន​អន្តរជាតិ​ផងដែរ​។​

​បើតាម​លោក ណ​ម វិស្សុត នាយក​ប្រតិបត្តិ​ក្រុមហ៊ុន អ៊ែរ​ស៊ាន បាន​ថ្លែងថា ក្រុមហ៊ុន​Air Asia នឹង​ដំណើរ​បិទ​ស្លាក​សញ្ញា Beyond the Games ស្លាក SEA GAMES​លើក​ទី​៣២ និង​ស្លាក​សញ្ញា ស​.​ស​.​យ​.​ក លើ​យន្តហោះ Air Asia រយៈពេល​ជាង​២​ខែ ខណៈ​តាមរយៈ​ការហោះហើរ​យន្តហោះ​មួយគ្រឿង​នេះ​ទៅតាម​បណ្តា​ប្រទេស​អាស៊ាន នឹង​រួមចំណែក​ជួយ​ផ្សព្វផ្សាយ​ពី​កម្ពុជា ទៅកាន់​មជ្ឈដ្ឋាន​អន្តរជាតិ​ឲ្យ​ស្គាល់​ពី​កម្ពុជា​ធ្វើជា​ម្ចាស់ផ្ទះ​រៀបចំ SEA GAMES​។​

​តាម​ការបញ្ជាក់​ពី​ឯកឧត្តម សុខ សប្បាយ​ណា បច្ចុប្បន្ន ស្លាក​សញ្ញា​BEYOND THE GAMES ដែល​ផ្សព្វផ្សាយ​ពី​ការងារ​ជាច្រើន​ដែល​កម្ពុជា​បាននិងកំពុង​ធ្វើ​លើសពី​ការរៀបចំ​ព្រឹត្តិការណ៍​SEA GAMES គឺ​បាននិងកំពុង​ផ្សព្វផ្សាយ​នៅ​គ្រប់​ទីកន្លែង​ទូទាំងប្រទេស​កម្ពុជា ផ្សព្វផ្សាយ​ស្ថានទូត​កម្ពុជា​ប្រចាំ​នៅ​បណ្តា​ប្រទេស​នានា មានការ​ផ្សព្វផ្សាយ​តាម​ការ​ដង្ហែរ​ភ្លើង​គុប តាម​ព្រលានយន្តហោះ​នានា​តាម​បណ្តា​ប្រទេស​តាមរយៈ​យន្តហោះ​AIR ASIA​ជាដើម​៕ អត្ថបទ​៖ ស៊ុម សុខ​ជា​