រដ្ឋមន្ត្រីការបរទេសសហរដ្ឋអាមេរិក លោក Antony Bliken បាននិយាយកាលពីថ្ងៃពុធថា សហរដ្ឋអាមេរិក បានចូលរួមជាមួយប្រទេសស៊ីរី តាមរយៈការប្រាស្រ័យទាក់ទងមួយប្រទេសទី៣ ដើម្បីព្យាយាមនាំយកអ្នកសារព័ត៌មានដែលត្រូវបានឃុំខ្លួន លោក Austin Tice ត្រលប់មកប្រទេសវិញ។

លោក Bliken បាននិយាយនៅក្នុងព្រឹត្តិការណ៍របស់ប្រព័ន្ធផ្សព្វផ្សាយវ៉ាស៊ីនតោនប៉ុស្តិ៍ នៅថ្ងៃទិវា​សេរីភាព​សារព័ត៌មានពិភពលោកថា យើងបានចូលរួមយ៉ាង​ ទូលំទូលាយទាក់ទងនឹងលោក Austin ដោយចូលរួមជាមួយប្រទេសស៊ីរី ​ទាក់ទងជាមួយប្រទេសទី៣​ ព្យាយាមស្វែងរកវិធីដើម្បីឲ្យលោក Austin Tice បានត្រលប់មកប្រទេសវិញ ហើយយើងនឹងមិន​បង្អែបង្អង់​នោះទេរហូត​ដល់យើងធ្វើវាបាន។

លោក Austin Tice ត្រូវបានចាប់ជាចំណាប់ខ្មាំងនៅក្នុងប្រទេសស៊ីរី ក្នុងឆ្នាំ២០១២។ ប្រធានាធិបតី លោក Joe Biden បានប្រកាសកាលពីឆ្នាំមុនថា រដ្ឋាភិបាលអាមេរិក ដឹងច្បាស់ថា លោក Austin Tice ត្រូវបានឃុំខ្លួនដោយរបបប្រទេសស៊ីរី ​និងបានអំពាវនាវឲ្យទីក្រុងដាម៉ាស់ សហការលើកិច្ចប្រឹងប្រែង​ដើម្បីដោះលែងលោក។ រដ្ឋាភិបាលរបស់មេដឹកនាំស៊ីរី លោក Bashar al-Assad ពុំបានទទួលស្គាល់ជាសាសធរណៈថាពួកគេកំពុងឃុំខ្លួន លោក Tice នោះទេ។ សហរដ្ឋអាមេរិកពុំមានទំនាក់ទំនងការទូតជាមួយរបបប្រទេសស៊ីរីនោះទេ និងបានបង្ហាញពីការ​ប្រឆាំង​ចំពោះការចូលទៅប្រាស្រ័យទំនាក់ទំនងជាមួយលោក Assad។

អ្នកនាំពាក្យសេតវិមាន លោកស្រី Karine Jean-Pierre បាននិយាយនៅក្នុងសន្និសីទសារព័ត៌មាន នៅសេតវិមានថា យើងពុំអាចបញ្ជាក់នូវជំនួបជាក់លាក់ណាមួយពីអតីត​កាល​ ឬពេល​បច្ចុប្បន្នបានទេ។ ដូចអ្នកដឹងហើយក្នុងជំនួបនិងការចរចាជាទូទៅ និងដើម្បីធានាបាន​ការដោះលែងជនជាតិអាមេរិកដែលត្រូវបានឃុំខ្លួនដោយអយុត្តិធម៌ ជាចំណុចរសើបបំផុត។