​កាលពី​ថ្ងៃ​ពុធ (៣ ឧសភា​) រដ្ឋមន្ត្រីការបរទេស​ជប៉ុន លោក Yoshimasa Hayashi បាន​ជួប​ពិភាក្សាគ្នា​ជាមួយ​ប្រធានាធិបតី​ប៉េ​រូ លោកស្រី Dina Boluarte ក្នុង​ទីក្រុង​លី​ម៉ា ខណៈដែល​មេដឹកនាំ​ទាំងពីរ​បាន​ពិភាក្សា​អំពី​បញ្ហា​ទ្វេភាគី ដើម្បី​ពង្រឹង​ទំនាក់ទំនង​ពាណិជ្ជកម្ម​។ លោក Hayashi និង​លោកស្រី Boluarte បាន​ជួបគ្នា​នៅ​វិមាន​ប្រធានាធិបតី​ក្នុង​ទីក្រុង​លី​ម៉ា ដើម្បី​ប្រារព្ធ​ខួប​លើក​ទី ១៥០ នៃ​ការចាប់ផ្តើម​ទំនាក់ទំនង​ការទូត​រវាង​ប្រទេស​ទាំងពីរ​។​

​មន្ត្រី​ការបរទេស​ជប៉ុន​រូប​នេះ ក៏បាន​ជួប​ជាមួយ​សម​ភាគី​ប៉េ​រូ​លោកស្រី Ana Cecilia Gervasi នៅ​ទីស្តីការ​ក្រសួងការបរទេស​នៃ​ប្រទេស​ប៉េ​រូ ជាទី​ដែល​អ្នក​ទាំង​ពីរបាន​ថ្លែងសេចក្តី​ថ្លែងការណ៍​រួមគ្នា​មួយ។

លោក Hayashi បានបង្ហាញ​ពី​ការរំពឹងទុក​របស់​ប្រទេស​ជប៉ុន​ចំពោះ​តួនាទី​ប្រទេស​ប៉េ​រូ​ដែលជា​ដៃគូ​សេដ្ឋកិច្ច​ដ៏​សំខាន់​ក្នុង​ការពង្រឹង​ខ្សែសង្វាក់​ផ្គត់ផ្គង់​សកល​។​

​យោងតាម​ក្រសួងការបរទេស​ប៉េ​រូ ពាណិជ្ជកម្ម​រវាង​ប្រទេស​ទាំងពីរ​បាន​កើន​ដល់​៤,២​ពាន់​លាន​ដុល្លារ​នៅ​ឆ្នាំ​២០២២ ដែល​ធ្វើឱ្យ​ប្រទេស​អាស៊ី​មួយ​នេះ​ក្លាយជា​ដៃគូ​ពាណិជ្ជកម្ម​ធំ​ទី​៤​របស់​ប៉េ​រូ​។ លោក Hayashi ក៏បាន​និយាយ​ផងដែរ​ថា ប្រទេស​ជប៉ុន និង​ប្រទេស​ប៉េ​រូ​បាន​យល់ព្រម​ធ្វើការ​យ៉ាង​ជិតស្និទ្ធ ដើម្បី​ឆ្លើយតប​ទៅនឹង​ស្ថានភាព​អន្តរជាតិ​នាពេល​បច្ចុប្បន្ន រួមទាំង​សង្គ្រាម​រវាង​រុស្ស៊ី និង​អ៊ុយ​ក្រែ​ន​ផងដែរ​៕​