​ការិយាល័យ​ទទួល​បណ្តឹង​ពលរដ្ឋ​នៃ​ប្រទេស​កូ​ឡុំ​ប៊ី បាន​និយាយថា​កាលពី​ថ្ងៃ​ពុធ (៣ ឧសភា​)​ថា ក្រុម​ឧទ្ទាម​ទ័ព​ព្រៃធំ​បំផុត​ទី​ពីរ​របស់​ប្រទេស​កូ​ឡុំ​ប៊ី បាន​ដោះលែង បុរស​ជនជាតិ​ស៊ុយអែត​-​សញ្ជាតិ​អាមេរិក ដែល​ត្រូវបាន​ចាប់ខ្លួន​តាំងពី​ខែមីនា​មក​។​

​បុរស​ជនជាតិ​ស៊ុយអែត​-​សញ្ជាតិ​អាមេរិក​ឈ្មោះថា Ulf Bilger Erlingsson ដែល​ត្រូវបាន​ចាប់ជំរិត​ដោយ​ក្រុម​ឧទ្ទាម​កងទ័ព​រំដោះជាតិ (ELN) កាលពី​ថ្ងៃទី​១​ខែមីនា ត្រូវបាន​ដោះលែង​កាលពី​ថ្ងៃ​ពុធ ហើយ​បាន​បញ្ចូនទៅ​ឱ្យ​បេសកកម្ម​មនុស្សធម៌ នៅក្នុង​នាយកដ្ឋាន Norte de Santander នៅ​ភាគ​ឦសាន​នៃ​ប្រទេស​កូ​ឡុំ​ប៊ី​។​

​មន្ត្រី​ទទួល​ពាក្យបណ្តឹង​ពលរដ្ឋ លោក Carlos Camargo បាន​និយាយថា​បេសកកម្ម​មនុស្សធម៌ បាន​ស្ថិតនៅក្នុង​តំបន់ Catatumbo អស់​រយៈពេល​ជាច្រើន​ថ្ងៃ ដើម្បី​ស្វះស្វែង​ឲ្យ​មានការ​ដោះលែង​លោក Bilger Erlingsson ។ ក្រុម​ឧទ្ទាម​នោះ បាន​បញ្ជាក់ថា​ខ្លួន​បាន​ចាប់ជំរិត​លោក Erlingsson អាយុ ៦៣ ឆ្នាំ​កាលពី​ខែមេសា​។

​រដ្ឋាភិបាល​របស់​ប្រទេស​កូ​ឡុំ​ប៊ី និង​ក្រុម​ឧទ្ទាម បានចាប់ផ្តើម​កិច្ចចរចា​សន្តិភាព​ជុំ​ទី​៣ កាល​ថ្ងៃ​អង្គារ (២ ឧសភា​) នៅ​ទីក្រុង​ឡា​ហាវ៉ាន ប្រទេស​គុយបា​។ ក្រុម​ឧទ្ទាម​កងទ័ព​រំដោះជាតិ (ELN) ត្រូវបាន​បង្កើតឡើង​ក្នុង​ឆ្នាំ១៩៦៤ ដោយ​ក្រុម​អាចារ្យ​សាសនា​គ្រឹ​ស្ត​និកាយ​កាតូលិក មាន​ទស្សនៈ​ជ្រុលនិយម មាន​សមាជិក​ប្រហែល ៥.៨៥០​នាក់ រួមទាំង​អ្នក​ប្រយុទ្ធ ២.៩០០​នាក់ ហើយ​ត្រូវបាន​ចោទប្រកាន់​ពីបទ​ផ្គត់ផ្គង់​ខ្លួនឯង​តាមរយៈ​ការជួញដូរ​គ្រឿងញៀន ធ្វើ​អាជីវកម្ម​រ៉ែ​ខុសច្បាប់ និង​ការចាប់​ជំរិត​ទារប្រាក់​៕​