ប្រទេសអ៊ុយក្រែន រុស្ស៊ី ទួរគី និងអង្គការសហប្រជជាតិ កាលពីថ្ងៃសុក្រទី៥ ខែ ឧសភា ពុំបានអនុញ្ញាតឲ្យនាវាថ្មីៗណាមួយស្ថិតនៅក្រោមកិច្ចព្រមព្រៀងនាំចេញគ្រាប់ធញ្ញជាតិអ៊ុយក្រែន នៅសមុទ្រខ្មៅដោយសុវត្ថិភាពនោះទេ។

អ្នកនាំពាក្យរងអង្គការសហប្រជាជាតិ លោក Farhan Haq បានប្រាប់អ្នកសារព័ត៌មានថា ការត្រួតពិនិត្យប្រចាំថ្ងៃលើនាវាដែលត្រូវបានអនុញ្ញាតកាលពីពេលមុន នៅបន្ត។

ក្រុមមន្ត្រីមកពីភាគីទាំង៤ បានបង្កើតមជ្ឈមណ្ឌលសម្របសម្រួលរួមមួយ(JCC)នៅក្នុងទីក្រុងអ៊ីស្តង់ ប៊ុល សម្រាប់អនុវត្តកិច្ចព្រមព្រៀងនៅសមុទ្រខ្មៅ ដែលបានព្រមព្រៀងកាលពីខែកក្កដា។

នៅក្នុងសម្រង់ខ្លឹមសារសង្ខេបនៃលិខិតដែលមើលឃើញដោយសារព័ត៌មានរ៉យទ័រ បានឲ្យដឹងថា រុស្ស៊ីបានប្រាប់សមភាគីមជ្ឈមណ្ឌលសម្របសម្រួលរួមកាលពីខែមុនថា ខ្លួននឹងមិនយល់ព្រមឲ្យ នាវាថ្មីៗណាមួយចូលរួមឡើយ ប្រសិនបើប្រតិបត្តិកររបស់ពួកគេមិនធានាថា ច្រកផ្ទេរទាំងនោះ នឹងធ្វើឡើងនៅត្រឹមថ្ងៃទី១៨ ខែឧសភា ជាកាលបរិច្ឆេទបិទកិច្ចព្រមព្រៀងតាមការរំពឹងទុក។ ប្រទេសអ៊ុយក្រែន បាននិងកំពុងដាក់ជូនបញ្ជីនាវារាល់ថ្ងៃដែលត្រូវបានអនុញ្ញាត។ ពេលទទួលបានការអនុញ្ញាត នាវាទាំងនោះក្រោយមក ត្រូវបានពិនិត្យដោយមន្ត្រីមជ្ឈមណ្ឌល សម្របសម្រួលរួម នៅជិតប្រទេសទួរគី មុនពេលធ្វើដំណើរទៅកាន់កំពុងផែសមុទ្រខ្មៅរបស់​អ៊ុយក្រែន ​តាមច្រករបៀងមនុស្សធម៌ដែនសមុទ្រ ​ដើម្បីប្រមូលទំនិញរបស់ពួកគេ ហើយត្រលប់​ទៅកាន់ដែនទឹកប្រទេសទួរគីវិញ ​សម្រាប់ការត្រួតពិនិត្យចុងក្រោយ។

អង្គការសហប្រជាជាតិ និងប្រទេសទួរគី បានសម្របសម្រួលកិច្ចព្រមព្រៀងការនាំចេញគ្រាប់​ធញ្ញជាតិ​នៅសមុទ្រខ្មៅដើម្បីជួយដោះស្រាយវិបត្តិស្បៀង​អាហារសកល ដែលត្រូវបធ្លាក់​ដុនដាបដោយសង្គ្រាម​របស់ទីក្រុងមូស្គូ នៅអ៊ុយក្រែន។

ទន្ទឹមនឹងនេះដែរ រុស្ស៊ី ​បានទទួលយកកិច្ចព្រមព្រៀង ​រយៈពេល៣ឆ្នាំ ​ដែលអង្គការសហប្រជាជាតិ បាន​ព្រមព្រៀងដើម្បីព្យាយាមជួយ​ និងដកចេញឧសបសគ្គ​ចំពោះគ្រាប់ធញ្ញជាតិ និងការនាំចេញជីរបស់រុស្ស៊ី។