ភ្នំពេញ ៖ សាកលវិទ្យាល័យភូមិន្ទវិចិត្រសិល្បៈ នៃក្រសួងវប្បធម៌ និងវិចិត្រសិល្បៈ ព្រះរាជាណាចក្រកម្ពុជា នាថ្ងៃទី៥ ខែឧសភា ឆ្នាំ២០២៣ បានទទួលស្វាគមន៍ដំណើរទស្សនកិច្ចរបស់ឯកឧត្តម កៃ រ៉ាឡា ហ្សាណាណា ហ្គោសម៉្សៅ បច្ចុប្បន្នជាប្រធានក្រុមចរចាព្រំដែនសមុទ្រ និងជាអតីតប្រធានាធិបតី និងជាអតីតនាយករដ្ឋមន្រ្ដី នៃ​សាធារណរដ្ឋប្រជាធិបតេយ្យទីម័រខាងកើត រួមនឹងគណៈប្រតិភូ។

​ឯកឧត្តម បណ្ឌិត ហេង សុផាឌី សាកលវិទ្យាធិការ នៃសាកលវិទ្យាល័យភូមិន្ទវិចិត្រសិល្បៈ បានថ្លែងថា ថ្ងៃនេះ​សាកលវិទ្យាល័យមានកិតិ្តយស ដែលបានទទួលស្វាគមន៍អតីតប្រធានាធិបតី និងជាអតីតនាយករដ្ឋមន្រ្ដី នៃសាធារណរដ្ឋប្រជាធិបតេយ្យទីម័រខាងកើត រួមនឹងគណៈប្រតិភូបានអញ្ជើញ​មកធ្វើទស្សនកិច្ចក្នុង​សាកលវិទ្យាល័យ។ មិនមែនជារឿងចៃដន្យនោះទេ កាលពីប៉ុន្មានឆ្នាំមុន ឯកឧត្តម ឯកអគ្គរដ្ឋទូត នៃ​សាធារណរដ្ឋប្រជាធិបតេយ្យ​ទីម័រខាងកើត បានមកធ្វើទស្សនកិច្ចនៅក្នុងសាកលវិទ្យាល័យភូមិន្ទវិចិត្រសិល្បៈ ដើម្បីសិក្សាស្វែងយល់អំពីដំណើរការ នៃការបណ្តុះបណ្តាលនិសិ្សតនៅក្នុងសាកលវិទ្យាល័យ ក្នុងនោះឯកឧត្តម ឯកអគ្គរដ្ឋទូត មានបំណងសុំភ្ជាប់​ទំនាក់ទំនងជាមួយសាកលវិទ្យាល័យ នៃទីម័រខាងកើត។ ជាពិសេសក្រោយពីបានទស្សនកិច្ចហើយនោះ ឯកឧត្តម ឯកអគ្គរដ្ឋទូត តែងតែមានទំនាក់ទំនងជា​មួយ​សាកលវិទ្យាល័យ​​ជាប្រចាំ តាមរយៈប្រព័ន្ធតេឡេក្រាម និងអ៊ីម៉ែលជាដើម និងផ្លាស់ប្តូរព័ត៌មានផ្សេងៗផងដែរ។

នាឱកាសនោះឯកឧត្តម កៃ រ៉ាឡា ហ្សាណាណា ហ្គោសម៉្សៅ មានចំណាប់អារម្មណ៍ខ្ពស់ ចំពោះការបណ្តុះ​បណ្តាល​ធនធានមនុស្សនៅក្នុងសាកលវិទ្យាល័យភូមិន្ទវិចិត្រសិល្បៈ ដែលមានជំនាញ៥ម​ហា​វិទ្យាល័យ។ ​ក្នុងនោះឯកឧត្តម មានបំណងធ្វើកិច្ចសហប្រតិបតិ្តការពង្រឹង រវាងសាកលវិទ្យាល័យ និងសាកលវិទ្យាល័យ នៃ​ប្រទេសទាំងពីរ ទីម័រខាងកើត និងកម្ពុជា ទៅលើជំនាញដែលមានភាពប្រហាក់ប្រហែលគ្នា។

ជាចុងក្រោយសាកលវិទ្យាល័យភូមិន្ទវិចិត្រសិល្បៈ ក៏បានប្រគល់គំនូរចំនួន៣ផ្ទាំង ដែលគូរដោយនិស្សិតមហាវិទ្យាល័យ​សិល្បៈសូនរូប​​ ដើម្បីជាអំណោយជូនឯកឧត្តម កៃ រ៉ាឡា ហ្សាណាណា ហ្គោសម៉្សៅ ផងដែរ៕ ដោយ ៖ រដ្ឋា