ព្រះមហាក្សត្រ Charles និងព្រះមហាក្សត្រិយ៍ Camilla បានឡើងគ្រងរាជសម្បត្តិ នៅក្នុងពិធីជាប្រវត្តិសាស្រ្តមួយ ដោយមានការអបអរសាទរពីក្រុមអ្នកគាំទ្រ នៅមុខព្រះបរមរាជវាំង Buckingham Palace ។

ក្រុមអ្នកគាំទ្ររាប់ពាន់នាក់ បានជួបជុំគ្នានៅសាលមុខព្រះបរមរាជវាំង បើទោះបីជាមានភ្លៀងធ្លាក់​ក៏ដោយ ក្រោយ ពិធីឡើងគ្រងរាជរៀបចំឡើងតាមបែបសាសនា​នៅព្រះវិហារ Westminster Abbey និងការរៀបចំពិធីទ្រង់ទ្រាយធំនៅទូទាំងទីក្រុងឡុងដ៍ ។

ព្រះមហាក្សត្រ និងព្រះអគ្គមហេសី បានលើកព្រះហស្តពីយ៉រព្រះបរមរាជវាំង ស្របពេលដែលការសម្តែងរបស់កងភូមិន្ទយន្តហោះ RAF Red Arrows បង្កើតបានទស្សនីយភាពពណ៌ក្រហម ស. និងខៀវនៅលើផ្ទៃមេឃ ។

ប៉ុន្តែ BBCយល់ឃើញថា ព្រះអង្គម្ចាស់ Harry ពុំត្រូវបានអញ្ជើញឲ្យចូលរួមពិធីឡើងគ្រងរាជ​សម្បត្តិរបស់ពួកទ្រង់នោះឡើយ ។

ទោះបីជាយ៉ាងណាក៏ដោយ គេបានឃើញព្រះអង្គម្ចាស់នៃវិមាន Sussex អង្គនេះ មានវត្តមានក្នុង​ពិធីនៅ​ព្រះរាជដំណាក់ ដោយទ្រង់ប្រថាប់លើកៅអី ២ជួរពីក្រោយព្រះរាមរបស់ទ្រង់គឺព្រះអង្គម្ចាស់ William ដែលនេះគឺជាលើកដំបូងហើយដែលគេមើលឃើញពួកទ្រង់ទាំង ២អង្គ នៅជាមួយគ្នា ចាប់តាំងពីការចេញផ្សាយជីវប្រវត្តិ Spare របស់ព្រះអង្គម្ចាស់ Harry ។ ក្រោយមកព្រះអង្គ Harry បានចាកចេញទៅសហរដ្ឋអាមេរិកភ្លាមៗ ។

ពិធីឡើងគ្រងរាជសម្បត្តិរយៈពេល ២ម៉ោងនេះដែរ ដែលជាការរៀបចំពិធីឡើងគ្រង​រាជជាលើក​ដំបូង ក្នុងរយៈពេល៧០ឆ្នាំនោះ ត្រូវបានគេទស្សនាតាមកញ្ចក់ទូរទស្សន៍នៅទូទាំង​ពិភពលោក ក៏ដូចជា​មានក្រុមអ្នកគាំទ្រប្រហែល ២.៣០០នាក់នៅក្នុងព្រះរាជដំណាក់ ៕