អំពើហិង្សាដោយអាវុធ គឺជាបញ្ហានៅក្នុងជីវិតរបស់ប្រជាជនអាមេរិក ប៉ុន្តែបញ្ហាគឺស្ថិតនៅលើនយោបាយកម្រិតខ្ពស់ ដែលជំរុញឲ្យអ្នកតស៊ូមតិលើការគ្រប់គ្រងអាវុធប្រឆាំងនឹងអ្នកការពារសិទ្ធិដើម្បី កាន់អាវុធ។

មានការបាញ់ប្រហារសម្លាប់រង្គាលយ៉ាងហោចណាស់១៦០លើក នៅទូទាំងសហរដ្ឋអាមេរិក នៅឆ្នាំនេះ។ ទាំងនោះរួមទាំងការវាយប្រហារនៅថ្ងៃរៀបចំពិធីជប់លៀងខួបកំណើត១៦ឆ្នាំ ក្នុងទីក្រុង Alabama ដែលបានបណ្ដាលឲ្យមនុស្ស៤នាក់ស្លាប់ ការបាញ់ប្រហារនៅសាលារៀន​មួយក្នុងទីក្រុង Nashvilleដែលមានកុមារ៣នាក់ និងមនុស្សចាស់៣នាក់ស្លាប់ និងការបាញ់ប្រហារ​សម្លាប់រង្គាលនៅរដ្ឋ Kentucky កាលពីថ្ងៃចន្ទសប្ដាហ៍មុន ដែលបណ្ដាលឲ្យមនុស្ស៤នាក់ស្លាប់។

ទិន្នន័យពីមជ្ឈមណ្ឌលតាមដានអំពើហិង្សាដោយអាវុធ Gun Violence Archive ជាមជ្ឈមណ្ឌល​ស្រាវជ្រាវ​ទិន្នន័យមិនស្វែងរកប្រាក់ចំណេញ បង្ហាញថា ​ចំនួននៃការបាញ់ប្រហារសម្លាប់រង្គាល បានកើនឡើងខ្ពស់ក្នុងរយៈពេលប៉ុន្មានឆ្នាំថ្មីៗនេះ ។

ក្នុងឆ្នាំនីមួយៗនៃរយៈពេល៣ឆ្នាំចុងក្រោយនេះ មានការបាញ់ប្រហារសម្លាប់រង្គាលជាង៦០០ លើក ស្ទើរតែ២លើកក្នុងមួយថ្ងៃជាមធ្យម។

ខណៈសហរដ្ឋអាមេរិក ពុំមាននិយមន័យមួយសម្រាប់ការបាញ់ប្រហារសម្លាប់រង្គាល ​មជ្ឈមណ្ឌល Gun Violence Archive ​កំណត់ការបាញ់ប្រហារសម្លាប់រង្គាលថាជាឧបទ្ទវហេតុ ដែលមានមនុស្ស​៤នាក់ ឬច្រើនជាងនេះ បានរងរបួស ឬស្លាប់។ទិន្នន័យរបស់ខ្លួនរួមទាំងការបាញ់ប្រហារនានា​ដែលបានកើតឡើងនៅក្នុងផ្ទះ និងតាមទីសាធារណៈ។

ការបាញ់ប្រហារដ៏សាហាវដូចជា ការវាយប្រហារនៅទីក្រុង Las Vegas ឆ្នាំ២០១៧ បានសម្លាប់មនុស្សជាង៥០នាក់ ​និងប្រមាណ៥០០នាក់រងរបួស ។ ​ទោះយ៉ាងណា ការបាញ់ប្រហារ​សម្លាប់រង្គាលធំៗ បានបណ្ដាលឲ្យមនុស្សតិចជាង១០នាក់ស្លាប់៕