ភ្នំពេញ៖ សម្ដេចតេជោ ហ៊ុន សែន នាយករដ្ឋមន្រ្ដីនៃកម្ពុជា តាមរយៈសារសំឡេងពិសេស នារសៀលថ្ងៃទី៨ ខែឧសភា ឆ្នាំ ២០២៣នេះ បានអំពាវនាវដល់នាយឧត្តមសេនីយ៍ សៅ សុខា ឱ្យបន្តកាន់តំណែងធ្វើជាប្រធានសហព័ន្ធកីឡាបាល់ទាត់កម្ពុជាបន្តទៀត ខណៈតាមរយៈការ​ដឹកនាំរបស់ឯកឧត្ដមបានបង្កើតនូវការរីកច្រើនឈានឡើងជាលំដាប់​នៅក្នុងវិស័យកីឡាបាល់ទាត់កម្ពុជា។

សម្ដេចតេជោ ហ៊ុន សែន មានប្រសាសន៍ថា កាលពីថ្ងៃទី៧ ខែឧសភានេះ បន្ទាប់ពីបញ្ចប់ការប្រកួត​បាល់ទាត់រវាងក្រុមជម្រើសជាតិកម្ពុជា និងមីយ៉ាន់ម៉ា ហើយទទួលលទ្ធផលមិនបានល្អ នាយឧត្តមសេនីយ៍ សៅ សុខា ដែលជាប្រធានសហព័ន្ធ​បាល់ទាត់កម្ពុជា បានសុំលាលែងចេញពី​តំណែងប្រធានសហព័ន្ធ ​កីឡាបាល់ទាត់។

សម្ដេចតេជោ បានសង្កេតឃើញថា បន្ទាប់ពីទទួលបានព័ត៌មានការលាលែងពីតំណែង​របស់​ឯកឧត្ដម សៅ សុខា មានមនុស្សជាច្រើនបានបង្ហាញនៅការខកចិត្ត ​និងការសោកស្ដាយ ចំពោះ ឯកឧត្ដម សៅ សុខា ដែលធ្លាប់បានដឹកនាំបង្កើតនូវការរីកច្រើនឈានឡើងជាលំដាប់​នៅក្នុង​វិស័យកីឡាបាល់ទាត់កម្ពុជា។ សម្ដេចតេជោ បានថ្លែងថា បើទោះបីជាកីឡាបាល់ទាត់​របស់​កម្ពុជាមិនទាន់លេងបានល្អទៅតាមការចង់​បានក៏ដោយចុះ ក៏ប៉ុន្ដែវិស័យកីឡាបាល់ទាត់​កម្ពុជាបានដើរចេញឆ្ងាយពីចំណុចដែលកម្ពុជាមិនធ្លាប់មាន កាលពីពេលមុនរួចទៅហើយ។

សម្ដេចតេជោ បញ្ជាក់ថា មានប្រទេសច្រើនណាស់ដែលវិស័យកីឡាបាល់ទាត់ មិនអាចទទួលបាន​នូវលទ្ធផលល្អ ​ខណៈប្រទេសខ្លះមានប្រជាជនរហូតដល់ទៅជាង ១ ពាន់លាននាក់ ក៏វិស័យកីឡា​បាល់ទាត់​របស់គេមិនខ្លាំងនោះដែរ។ ចំណែកកម្ពុជា ​មានប្រជាជនត្រឹមជាង ១០ លាននាក់ វិស័យ​បាល់ទាត់​កម្ពុជាអាចរីកច្រើនបែបនេះ​ គឺជាលទ្ធផលល្អពេកហើយ នៅក្នុងកែវភ្នែកប្រជាជនកម្ពុជា ដែលវិស័យបាល់ទាត់កម្ពុជា ពីមុនធ្លាប់តែឋិតនៅបាតតារាង។

សូមជម្រាបថា បន្ទាប់ពីក្រុមបាល់ទាត់ជម្រើសជាតិកម្ពុជា ​អាយុក្រោម ២២ឆ្នាំ បានប្រកួតចាញ់​ពីរ​ប្រកួតជាប់គ្នា ​និងសល់ក្តីរំពឹងតិចតួច ​ដើម្បីឡើងទៅវគ្គបន្តក្នុងការប្រកួតស៊ីហ្គេម​ ២០២៣ ឯកឧត្តម សៅ សុខា ប្រធានសហព័ន្ធកីឡាបាល់ទាត់កម្ពុជា ​បានប្រកាសភ្លាមៗលាលែងពីតំណែង​ជាប្រធាន​សហព័ន្ធកីឡាបាល់ទាត់កម្ពុជា ក្រោយ​កម្ពុជា ​ចាញ់​ក្រុមកីឡាករ មីយ៉ាន់ម៉ា ​០ទល់នឹង២ កាលពីយប់ថ្ងៃទី៧ ​ខែឧសភា ឆ្នាំ២០២៣នេះ ​តាមការសន្យារបស់ឯកឧត្ដម ​កាលពីកម្ពុជា យកឈ្នះទីម័រក្នុងការប្រកួតដំបូង៕អត្ថបទ៖ វ៉ន ដារ៉ា