សារព័ត៌មាន​ក្នុងស្រុក បាន​រាយការណ៍​នៅ​ពីថ្ងៃ​ចន្ទ​ថា មនុស្ស​យ៉ាងហោចណាស់ ​២២​នាក់ រួមទាំង​កុមារ ០៧​នាក់ បាន​លង់ទឹក​ស្លាប់ បន្ទាប់ពី​ទូក​មួយគ្រឿង​បាន​ក្រឡាប់​លិច​នៅក្បែរ​តំបន់ឆ្នេរ​ទីក្រុង Tanur នៅក្នុង​ស្រុក Malappuram នៃ​រដ្ឋ​កេ​រ៉ា​ឡា​ភាគខាងត្បូង​របស់​ប្រទេស​ឥណ្ឌា។

​ឧបទ្ទវ​ហេតុនេះ បានកើត​ឡើង​នៅ​ម៉ោង​ប្រហែល​ ៧​យប់ ជិត​ឆ្នេរសមុទ្រ Tuvalthiram ក្នុង​តំបន់ Tanur របស់​ស្រុក​ខាងលើ។

ទូក​នេះ ត្រូវបាន​គេ​រាយការណ៍​ថា បាន​ដឹក​អ្នកដំណើរ​ ៣៥​នាក់។ ទូរទស្សន៍​ក្នុងស្រុក NDTV បាន​និយាយ ដោយ​សំអាង​ប្រភព​ពី​រដ្ឋមន្ត្រី​ផ្នែក​កីឡា​របស់​រដ្ឋ​កេ​រ៉ា​ឡា​ថា លោក V Abdurahiman មនុស្ស​៤​នាក់ ត្រូវបាន​បញ្ជូន​ទៅកាន់​មន្ទីរពេទ្យ ក្នុងស្ថានភាព​របស់​ធ្ងន់។

​ប្រតិបត្តិ​ការសង្គ្រោះ​នៅតែ​បន្ត​នៅឡើយ​ដើ​​ម្បី​ស្វែងរក​អ្នក​នៅមាន​ជីវិត បន្ថែមទៀត​។

​លោកនាយក​រដ្ឋមន្ត្រី​ឥណ្ឌា Narendra Modi និង​លោក​ប្រធានាធិបតី Droupadi Murmu បា​ចូលរួម​មរណទុក្ខ​ឧបទ្ទវ​ហេតុនេះ និង​បាន​ផ្ញើ​សារ​រំលែក​ទុក្ខ​ជូន​ក្រុមគ្រួសារ​ជនរងគ្រោះ​។

​លោកនាយក​រដ្ឋមន្ត្រី​បាន​សរសេរ​លើ​បណ្ដាញ​សង្គម​ធ្វីត​ទ័​រ ថា សាកសព​នីមួយៗ​ទទួលបាន​ប្រាក់ ចំនួន​ ២០​ម៉ឺន​រូពី​ស្មើនឹង​២.៤៤៧ ដុល្លារ​អាមេរិក ពី​មូលនិធិ​សង្គ្រោះ​ជាតិ​របស់​លោកនាយករ​ដ្ឋ​មន្ត្រី ។ ចំណែក​មូលហេតុ​ពិតប្រាកដ​នៃ​ឧបទ្ទវ​ហេតុនេះ គេ​នៅ​មិនទាន់​ដឹង​នៅឡើយ​ទេ​៕​