ស្របពេលមានករណីភ្លើងឆេះព្រៃទ្រង់ទ្រាយធំនៅខេត្ត Alberta ក្រុមអាជ្ញាធរកាណាដា បានបង្ខំឲ្យប្រជាពលរដ្ឋជិត ៣ម៉ឺននាក់ ជម្លៀសខ្លួនចេញពីលំនៅស្ថានរបស់ពួកគេ កាលពីចុងសប្តាហ៍កន្លងទៅ។
ក្រុមមន្ត្រីនិយាយកាលពីថ្ងៃអាទិត្យថា មានចំហេះព្រៃជាង ១០០កន្លែង នៅក្នុងខេត្ត Alberta ហើយប្រហែល ១ភាគ៣ លែងអាចគ្រប់គ្រងបានទៀតហើយ។
លោក Christie Tucker គឺជាអ្នកគ្រប់គ្រងអង្គភាពព័ត៌មានភ្លើងឆេះព្រៃខេត្ត Alberta និយាយថា ផ្ទៃដីសរុបនៃភ្លើងឆេះព្រៃក្នុងខេត្តនាឆ្នាំនេះ បច្ចុប្បន្នកើនឡើងជាង ៣៧៥.០០០ហិកតា។
ដោយឡែក លោក Colin Blair គឺជាប្រធានប្រតិបត្តិទីភ្នាក់ងារគ្រប់គ្រងគ្រោះអាសន្នខេត្ត Alberta និយាយថា មនុស្សជាង ២៩.០០០នាក់ ត្រូវបានជម្លៀសចេញពីលំនៅឋាន របស់ពួកគេទៅកាន់ទីតាំងសុវត្ថិភាព ស្របពេលដែលតំបន់សហគមន៍ផ្សេងទៀត ស្ថិតក្រោមការជូនដំណឹងពីការជម្លៀសខ្លួន ហើយប្រជាពលរដ្ឋរស់នៅក្នុងសហគមន៍ទាំងអស់នោះ គួរតែត្រៀមសម្រាប់ជម្លៀសខ្លួន ពេលជូនដំណឹងខ្លីនេះ។
ពួកគេបាននិយាយផងដែរថា គ្មានប្រជាពលរដ្ឋណាម្នាក់ ឬក្រុមភ្នាក់ងារពន្លត់អគ្គិភ័យក្នុងខេត្ត Alberta បានរងរបួសធ្ងន់ធ្ងរនោះទេ ហើយក្រុមអាជ្ញាធរ បានប្រកាសដាក់ខេត្តក្នុងគ្រាអាសន្នកាលពីថ្ងៃសៅរ៍៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
