ក្រសួងការបរទេស​ចិន​បាន​និយាយ​នៅ​ថ្ងៃ​ចន្ទ (៨ ឧសភា​)​នេះ​ថា ប្រទេស​ចិន​ប្រឆាំងនឹង​វិធានការ​ណាមួយ​ដែល​ប្រើប្រាស់​ទំនាក់ទំនង​ចិន​និង​រុស្ស៊ី​ជា​លេស​ស​ធ្វើ​ឲ្យ​ខូចខាត​ដល់​កិច្ចសហប្រតិបត្តិការ​ពា​ណិ​ជ្ជ​កម្ម។​

​ជា​ឆ្លើយតប​ទៅនឹង​ការដាក់ទណ្ឌកម្ម​របស់​សហភាព​អឺរ៉ុប​លើ​បណ្ដា​ក្រុមហ៊ុន​ចិន​ជុំវិញ​ការចោទប្រកាន់ថា​ពួកគេ​ជួយ​ដល់​ម៉ាស៊ីន​សង្គ្រាម​ដល់​រុស្ស៊ី អ្នកនាំពាក្យ​ក្រសួងការបរទេស​លោក Wang Wenbin បាន​និយាយថា ប្រសិនបើ​ទណ្ឌកម្ម​ទាំងនេះ​ចូល​ជា​ធរមាន ប្រទេស​ចិន​នឹង​ចាត់វិធានការ​យ៉ាង​ម៉ឺងម៉ាត់​ដើម្បី​ការពារ​ផលប្រយោជន៍​របស់ខ្លួន​។​

​លោក Wang បាន​និយាយ​នៅក្នុង​សន្និសីទ​សារព័ត៌មាន​ជាប្រចាំ​ថា "​ប្រទេស​ចិន​ប្រឆាំងនឹង​សកម្មភាព​ទាំងឡាយណា​ដែល​ប្រើប្រាស់​កិច្ចសហប្រតិបត្តិការ​រ​វាង​ចិន​និង​រុស្ស៊ី​ជា​លេស​ដើម្បី​ដាក់ទណ្ឌកម្ម​ខុសច្បាប់ ឬ​យុត្តាធិការ​ហួស​ដែន​កំណត់​ប្រឆាំងនឹង​ប្រទេស​ចិន​" ។​

​សារព័ត៌មាន Financial Times បាន​រាយការណ៍​កាលពី​ថ្ងៃអាទិត្យ (៧ ឧសភា​)​ថា សហភាព​អឺរ៉ុប​បានស្នើ​ដាក់ទណ្ឌកម្ម​លើ​បណ្ដា​ក្រុមហ៊ុន​ចិន​ដែល​ត្រូវបាន​ចោទប្រកាន់​ពីបទ​លក់​ឧបករណ៍​ដែល​អាច​យក​ប្រើ​ជា​អាវុធ​ដើម្បី​គាំទ្រ​ដល់​ម៉ាស៊ីន​សង្គ្រាម​របស់​រុស្ស៊ី​។ របាយការណ៍​នោះបាន​លើកឡើង​ដោយ​សំអាង​ដល់​ច្បាប់​ថតចម្លង​នៃ​បញ្ជី​ទណ្ឌកម្ម​ដែល​មើលឃើញ​ដោយសារ​ព័ត៌មាន FT ថា ក្រុមហ៊ុន​ចិន​ចំនួន​ប្រាំពីរ​ត្រូវបាន​ចុះបញ្ជី​នៅក្នុង​កញ្ចប់​ទណ្ឌកម្ម​ថ្មី​ដែល​នឹង​ត្រូវបាន​ពិភាក្សា​ដោយ​បណ្ដា​រដ្ឋ​សមាជិក​សហភាព​អឺរ៉ុប​ក្នុង​សប្តាហ៍​នេះ ។ គណៈកម្មការ​សហភាព​អឺរ៉ុប​មិនបាន​ឆ្លើយតប​ភ្លាមៗ​ចំពោះ​សំណើសុំ​ការអត្ថាធិប្បាយ​ទេ​៕​