ភ្នំពេញ៖ ប្រជាពលរដ្ឋបានបង្ហាញការភ្ញាក់ផ្អើល និងមោទកភាពជាខ្លាំង លើអត្តពលិកកម្ពុជា ដែលបានខិតខំប្រឹងប្រែងសម្ដែង និងប្រកួតប្រភេទកីឡានានា ហើយទទួលបាននូវមេដាយជាច្រើន និងកំពុងស្ថិតនៅលើកំពួលតារាង សម្រាប់ព្រឹត្តិការណ៍ស៊ីហ្គេម ឆ្នាំ២០២៣ ។

ក្នុងពេលទៅចូលរួមទស្សនាគាំទ្រការប្រកួតកីឡាស៊ីហ្គេម នៅពហុកីឡដ្ឋានជាតិអូឡាំពិក អ្នកគាំទ្រ លើកឡើងថា ពួកគេមានការភ្ញាក់ផ្អើល និងរំភើបជាខ្លាំងរួចម្ដងហើយ កាលពីថ្ងៃបើកព្រឹត្តិការណ៍ ស៊ីហ្គេម ​មិនស្មានថា​កម្ពុជាយើង បានរៀបចំយ៉ាងអស្ចារ្យ ធ្វើឲ្យពលរដ្ឋខ្មែរនៅទូទាំងប្រទេស​មាន​ការពេញចិត្តអបអរសាទរ ​និងប្រទេសជាច្រើននៅលើពិភពលោក ​ស្គាល់កាន់តែច្បាស់ពីកម្ពុជា ។

ពលរដ្ឋបានបន្តថា ពួកគេក៏កំពុងមានមោទកភាពជាខ្លាំងផងដែរ ចំពោះលទ្ធផលដែលកម្ពុជាកំពុង​ទទួលបានពីព្រឹត្តិការណ៍ស៊ីហ្គេម ឆ្នាំ២០២៣ ​ដែលកីឡាករ ​កីឡាការិនីខ្មែរ ខិតខំដណ្ដើមបាននូវ​មេដាយ​ជាច្រើន ពិសេសមេដាយមាសជាច្រើនគ្រឿង ។

ជាមួយនេះ អ្នកគាំទ្រទាំងអស់ បានជូនពរដល់អត្តពលិកកម្ពុជា បន្តនាំមកនូវមេដាយជូន​ប្រទេសជាតិ​បន្តទៀត ​ហើយទោះលទ្ធផលយ៉ាងណាក៏ដោយ​ ពួកគេនៅតែបន្តលើកទឹកចិត្ត និងគាំទ្រជានិច្ច ។

គួរបញ្ជាក់ថា គិតត្រឹមព្រឹកថ្ងៃទី៩ ខែឧសភា ឆ្នាំ២០២៣នេះ ​អត្តពលិកកម្ពុជា រកបានមេដាយ​សរុបប្រមាណ ១០០គ្រឿងហើយ ជូនប្រទេសជាតិ ​ខណៈចំនួននេះ ​គឺជាការរបំបែកកំណត់ត្រាមេដាយ ដែលកម្ពុជាទទួលបានកន្លងមក​ ហើយប្រភេទកីឡាជាច្រើនទៀត​ ក៏ត្រូវបានបំបែកកំណត់ត្រា និងទុកជាប្រវត្តិសាស្ត្ររបស់ខ្លួនផងដែរ ៕អត្ថបទ បាន សុខរិទ្ធិ