អេស្ប៉ាញ អាចនឹងដកចេញ ឬលុបចោលគម្រោងទិដ្ឋាការមាសរបស់ខ្លួន ដែលនឹងផ្តល់សិទ្ធិស្នាក់នៅដល់ជនបរទេសដែលវិនិយោគទុនលើវិស័យអចលនទ្រព្យក្នុងប្រទេសមួយនេះ។ នេះបើយោងតាមការអះអាងរបស់របស់លោក Iñigo Errejon គឺជាមេដឹកនាំគណបក្សនិយមឆ្វេងដែលចរចាបញ្ហាមួយនេះជាមួយរដ្ឋាភិបាល។
លោក Errejon និយាយប្រាប់ក្រុមអ្នកសារព័ត៌មានកាលពីថ្ងៃចន្ទថា គណបក្ស Mas Pais របស់លោក បានឈានដល់កិច្ចព្រមព្រៀងបឋមជាមួយក្រសួងសន្តិសុខសង្គម ដើម្បីបញ្ចប់កម្មវិធីមួយនេះ ដែលនឹងអនុញ្ញាតឲ្យអ្នកទិញអចនលទ្រព្យតម្លៃយ៉ាងហោច ៥០ម៉ឺនអឺរ៉ូ (ស្មើជាង ៥៥០.០០០ដុល្លារ) ហើយក្រុមគ្រួសាររបស់ពួកគេ ទទួលបានការអនុញ្ញាតឲ្យស្នាក់នៅរយៈពេល ៣ឆ្នាំ។
លោក Errejon និយាយថា សញ្ជាតិអេស្ប៉ាញពុំអាចទិញ-ដូរបានទេ ហើយទិដ្ឋាការមាសនាំឲ្យមានការហក់ឡើងខ្ពស់តម្លៃផ្ទះជួល និងបង្ខំអ្នកស្រុកចាកស្រុកទេសរបស់ពួកគេ ដោយពុំអាចបង្កើតការងារថ្មីបាន ។
ក្រសួងនឹងមិនបញ្ជាក់ពីផែនការណាមួយនៃការលុបចោលកម្មវិធីនោះទេ ។ មន្ត្រីមួយរូបដែលនៅស្និតនឹងកិច្ចពិភាក្សាមួយនេះ និយាយថា ពុំទាន់មានកិច្ចព្រមព្រៀងណាមួយឈានដល់នោះទេ ស្របពេលដែលក្រសួងនៅសិក្សាបន្ថែមទៀតលើសំណើររបស់គណបក្សនយោបាយ។
កាលពីព្រឹកថ្ងៃចន្ទ កាសែត El Pais បានរាយការណ៍ថា អេស្ប៉ាញកំពុងពិចារណាលើតម្រូវការតឹងរឹងជាងមុនសម្រាប់ការដាក់ពាក្យសុំទិដ្ឋាការមាស។
ខណៈពេលនោះដែរ សហភាពអឺរ៉ូប បានជំរុញឲ្យប្រទេសសមាជិករបស់ខ្លួន បញ្ចប់កម្មវិធីមួយនេះ ដែលអនុញ្ញាតឲ្យក្រុមវិនិយោគិនទទួលបានសញ្ញាតិ ព្រមទាំងរឹតបន្តឹងការត្រួតពិនិត្យ ពេលដែលចេញលិខិតអនុញ្ញាតឲ្យស្នាក់នៅ ដោយពួកគេចាត់ទុកថា វាគឺជាហានិភ័យសន្តិសុខ និងការលាងលុយកខ្វក់។ ដោយឡែកប្រទេសជិតខាងព័រទុយហ្គាល់ និយាយដែរថា ពួកគេនឹងបញ្ចប់គម្រោងស្រដៀងគ្នានេះនៅខែមីនា ឆ្នាំក្រោយ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
