រដ្ឋមន្ត្រីការបរទេសចិន លោក ឈីន កាង (Qin Gang) បាន ប្រកាន់ជំហរដ៏ម៉ឺងម៉ាត់អំឡុងជួបពិភាក្សាដោយស្មោះត្រង់ប៉ុន្តែជាការពិភាក្សាប្រកបដោយវិជ្ជមានជាមួយសមភាគីអាល្លឺម៉ង់ លោកស្រី Annalena Baerbock កាលពីថ្ងៃអង្គារ ស្ដីពីកង្វល់ទណ្ឌកម្មពាណិជ្ជកម្មលើរុស្ស៊ី ។

រដ្ឋមន្ត្រីទាំង២ បានពិភាក្សាគ្នារយៈពេលប្រហែល៤៥នាទី នៅក្នុងរដ្ឋធានីប៊ែរឡាំង ប្រទេសអាល្លឺម៉ង់ អំពីវិបត្តិអាកាសធាតុ និងរបៀបវារៈសំខាន់បំផុតផ្ដោតលើស្ថានភាពនៅក្នុងប្រទេសអ៊ុយក្រែន ។ បញ្ហាធំមួយដែលបានពិភាក្សារវាងភាគីទាំង២ គឺក្ដីបារម្ភអំពីក្រុមហ៊ុនចិនចំនួន៨ ដែលអាចប្រឈមនឹងទណ្ឌកម្មពីសហភាពអឺរ៉ុប។

សហភាពអឺរ៉ុបជឿថា ក្រុមហ៊ុនទាំងនោះ កំពុងផ្គត់ផ្គង់ទំនិញ ទៅឡឲ្យប្រទេសរុស្ស៊ី ដែលអាចត្រូវ​បានប្រើប្រាស់ដើម្បីផលិតអាវុធធ្វើសង្គ្រាមនៅអ៊ុយក្រែន ហើយលោកស្រី Baerbock បាននិយាយថា ប្លុកអឺរ៉ុបកំពុងធ្វើការដើម្បីទប់ស្កាត់ការគេចវេះចេញពីទណ្ឌកម្មលើរុស្ស៊ី ខណៈសហភាពអឺរ៉ុបចរចាកញ្ចប់វិធានការថ្មីៗ។

ថ្លែងទៅកាន់ក្រុមអ្នកសារព័ត៌មានជាមួយលោកស្រី Baerbock នៅរដ្ឋធានីប៊ែរឡាំង លោក ឈីន កាងបានបញ្ជាក់ជាថ្មីពីជំហររបស់ប្រទេសចិន ថាពួកគេពុំបានផ្គត់ផ្គង់អាវុធទៅឲ្យបណ្ដាប្រទេស ឬ តំបន់ដែលមានវិបត្តិ នោះទេ។

លោក ឈីន កាង បានបន្ថែមថា នេះគឺជាច្បាប់នៅក្នុងប្រទេសចិន ហើយនៅពេលយើងនាំចេញ​ផលិតផល​ប្រើប្រាស់គ្រប់ប្រភេទ យើងក៏មានច្បាប់ និងលិខិតអនុញ្ញាតដើម្បីគ្រប់គ្រង​ករណីទាំងនោះដែរ។មានការផ្លាស់ប្ដូរនិងកិច្ចសហប្រតិបត្តិការធម្មតារវាង​ក្រុមហ៊ុនរបស់​ប្រទេសចិននិងប្រទេសរុស្ស៊ី ហើយមិនត្រូវបានរំខានក្នុងវិស័យពាណិជ្ជកម្មនោះទេ ៕