យ៉ាងហោចណាស់ជនប៉ាឡេស្ទីន ១៥នាក់ រួមទាំងមេបញ្ជាការ៣នាក់នៃក្រុមសកម្មប្រយុទ្ធ ជីហាតអ៊ីស្លាម បានស្លាប់ក្នុងការវាយប្រហារតាមអាកាសរបស់អ៊ីស្រាអែលលើតំបន់ហ្គាហ្សា។

មន្ត្រីក្រសួងសុខាភិបាលប៉ាឡេស្ទីន បាននិយាយថា ស្ត្រីនិងកុមារ៨នាក់ ស្ថិតក្នុងចំណោមអ្នកស្លាប់។ មនុស្ស២២នាក់ផ្សេងទៀត បានរងរបួស។

អ៊ីស្រាអែលនិយាយថា មេដឹកនាំក្រុមជីហាតអ៊ីស្លាម ដែលខ្លួនបានដាក់គោលដៅកាលពីយប់មិញ បានចូលរួមក្នុងការវាយប្រហារកាលពីពេលថ្មីៗនេះលើជនស៊ីវិលអ៊ីស្រាអែល។

ក្រុមជីហាតអ៊ីស្លាម បានសន្យាសងសឹក ហើយក្រុមសកម្មប្រយុទ្ធមានមូលដ្ឋាននៅតំបន់ហ្គាហ្សា ត្រូវបានគេរំពឺងថា នឹងឆ្លើយតបដោយការបាញ់រ៉ូក្កែតចូលទៅក្នុងប្រទេសអ៊ីស្រាអែល។ ទំហំនៃភាពតានតឹងឡើងកម្តៅខ្លាំងណាមួយអាចកើតឡើង ទំនងជាអាស្រ័យលើបញ្ហាថា តើក្រុមហាម៉ាស់ ដែលគ្រប់គ្រងតំបន់ហ្គាហ្សានោះ សម្រេចចិត្តចូលរួមឬយ៉ាងណា។

នាយករដ្ឋមន្ត្រីអ៊ីស្រាអែល លោក Benjamin Netanyahu បានិយាយថា ប្រទេសរបស់លោក បាន ត្រៀមទប់គ្រប់លទ្ធភាពទាំងអស់ ហើយលោកបាននិយាយថា សត្រូវរបស់យើងមិនសាកល្បង​យើងនោះទេ។

ការវាយប្រហារជាច្រើនលើក គឺជាការវាយប្រហារបណ្តាលឲ្យមានមនុស្សស្លាប់ច្រើនបំផុត ចាប់តាំងពីការប្រយុទ្ធគ្នា៣ថ្ងៃ រវាងអ៊ីស្រាអែល ​និងក្រុមជីហាតអ៊ីស្លាមកាលពីខែ សីហា ដែលនៅ​ពេលនោះ ជនប៉ាឡេស្ទីន ៤៩នាក់ បានស្លាប់ នៅក្នុងតំបន់ហ្គាហ្សា។

ការវាយប្រហាររបស់អ៊ីស្រាអែល ​បានចាប់ផ្តើមកាលពីពេលព្រឹកថ្ងៃអង្គារ នៅពេលដែលយន្ត​ហោះចម្បាំង និងឧទ្ធម្ភាគចក្រប្រយុទ្ធចំនួន៤០គ្រឿង បានវាយប្រហារជាច្រើនលើកនៅទូទាំង​តំបន់ហ្គាហ្សាជាបន្តបន្ទាប់​ ដោយបានផ្តោតទៅលើលំនៅឋាន និងបណ្តាលឲ្យមានការភ័យស្លន់ស្លោ​ក្នុងចំណោមប្រជាពលរដ្ឋ។

រូបភាពបានបង្ហាញឲ្យឃើញ យ៉ាងហោចណាស់អគារលំនៅឋាន២កន្លែង បានបែកបាក់នៅផ្នែក​ខាងមុខ និងផ្នែកផ្សេងទៀត ត្រូវបានបំផ្លាញ។