​កំពង់ធំ​៖ ឯកឧត្ដម ហ៊ុន ម៉ា​ណែ​ត បាន​ថ្លែងថា តាមរយៈ​ការរៀបចំ​ធ្វើជា​ម្ចាស់ផ្ទះ​ នៃ​ព្រឹត្តិការណ៍​កីឡា​អាស៊ីអាគ្នេយ៍​លើក​ទី​៣២ និង​អាស៊ាន​ប៉ា​រ៉ា​ហេ្គ​ម​លើក​ទី​១២ ក្នុង​ឆ្នាំ​២០២៣ នេះ គឺសម្តេច​តេ​ជោ នាយករដ្ឋមន្ត្រី កំពុង​នាំ​កម្ពុជា​បោះជំហាន​ឆ្ពោះទៅមុខ​កាន់តែ​ឆ្ងាយ ឆ្ងាយ ដោយ​សម្រេចបាន​នូវ​ការលើកកម្ពស់​កិត្យានុភាព និង​ការធានា​រក្សា​ផលប្រយោជន៍​ជាតិ​។

​ឯកឧត្ដម​បាន​ថ្លែង​បែបនេះ ក្នុងឱកាស តំណាង​ដ៏​ខ្ពង់ខ្ពស់​របស់​សម្តេច​អគ្គមហាសេនាបតី​តេ​ជោ ហ៊ុន សែន និង សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន ក្នុង​ពិធី​បញ្ចុះ​ខណ្ឌសីមា និង​សម្ពោធ​ឆ្លង​ព្រះវិហារ​ថ្មី នៅ​វត្ត​សន្ទុក​ក្រៅ ស្ថិតនៅ​ភូមិ​សន្ទុក​ក្រៅ ឃុំ​កកោះ ស្រុក​សន្ទុក ខេត្តកំពង់ធំ នា​ថ្ងៃទី​១០ ខែឧសភា ឆ្នាំ​២០២៣​នេះ​។​

​ឯកឧត្ដម​បញ្ជាក់​ថា តាមរយៈ​ការរៀបចំ​ធ្វើជា​ម្ចាស់ផ្ទះ ​នៃ​ព្រឹត្តិការណ៍​កីឡា​អាស៊ីអាគ្នេយ៍​លើក​ទី​៣២ និង​អាស៊ាន​ប៉ា​រ៉ា​ហេ្គ​ម​លើក​ទី​១២ ក្នុង​ឆ្នាំ​២០២៣ គឺ​បាន​ផ្សព្វផ្សាយ​អំពី​ការ​ប្រែ​មុខមាត់​របស់​កម្ពុជា​នៅលើ​ឆាក​អន្តរជាតិ ដោយ​ឈាន​ចេញពី​ប្រទេស​ដែល​ធ្លាប់​ត្រូវបាន​ញាំញី​ដោយ​សង្គ្រាម​បែកបាក់ និង​ភាពភ័យខ្លាច ប្តូរ​មកជា​ទឹកដី​កោះ​សុខសន្តិភាព​, ស្ថិរភាព និង​សុខដុមរមនា​ត្រជាក់ត្រជុំ ព្រម​ជាមួយនឹង​ការបើកចំហរ​បេះដូង និង​ទឹកចិត្ត​យ៉ាង​ទូលំទូលាយ ដើម្បី​ទទួល​ស្វាគមន៍​បណ្តា​មិត្តភក្តិ​អន្តរជាតិ​មកពី​គ្រប់ទិសទី​ទាំង​ក្នុង​តំបន់ និង​សាកលលោក​៕​