នៅថៃមិនដល់រយៈពេល ២សប្ដាហ៍ផងទេ បន្ទាប់ពីបានផ្ដល់កំណើតដល់កូនទី២ របស់ខ្លួន លោកស្រី Paetongtarn Shinawatra ដែលជាទាយាទរបស់ត្រកូលយោបាយដ៏ល្បីល្បាញបំផុតរបស់ប្រទេសថៃ ត្រូវប្រឈមជាមួយនឹងព្រឹត្តិការណ៍ ដែលមិនអាចចៀសបាន។
ក្នុងខណៈដែលប្រទេសថៃឆ្ពោះទៅកាន់ការបោះឆ្នោតនៅថ្ងៃអាទិត្យ (ទី១៤ ខែឧសភា) ស្ត្រីវ័យ ៣៦ឆ្នាំរូបនេះ សង្ឃឹមថា នឹងផ្តល់ជ័យជម្នះឲ្យគណបក្សប្រឆាំងភឿថៃ (Pheu Thai) ពោលគឺជាការបន្តវេនចុងក្រោយបំផុតនៃចលនាដែលត្រូវបានបង្កើតឡើងដោយឪពុកជាមហាសេដ្ឋីរបស់លោកស្រី លោក Thaksin Shinawatra។
លោកស្រី Paetongtarn បានវិលត្រឡប់មកធ្វើយុទ្ធនាការវិញភ្លាម បន្ទាប់ពីសម្រាលបានកូនប្រុស កាលពីថ្ងៃទី១ ខែឧសភា បើទោះបីជារហូតមកទល់ពេលនេះ មានត្រឹមតែការទំនាក់ទំនងជាវីដេអូក៏ដោយ ខណៈដែលលោកស្រីប្រឹងប្រែងឲ្យក្លាយជានាយករដ្ឋមន្ត្រី ដែលក្មេងបំផុតមិនធ្លាប់មានរបស់ប្រទេសថៃ។
អ្នកនយោបាយជើងថ្មី ដែលរហូតមកទល់នឹងឆ្នាំមុន បានជួយគ្រប់គ្រងសាខាសណ្ឋាគារនៃចក្រភពអាជីវកម្មរបស់គ្រួសារអ្នកមានបំផុតនោះ លោកស្រី Paetongtarn ឥឡូវនេះ ប្រឈមជាមួយនឹងការប្រកួតប្រជែងចុងក្រោយរបស់ពួកគេទល់នឹងក្រុមយោធា ដែលបានបណ្តេញឪពុក និងម្តាយមីងរបស់លោកស្រីចេញពីអំណាច។
លោកស្រី Paetongtarn មានវត្តមានស្ទើរតែឥតឈប់ឈរក្នងដំណើរនៃយុទ្ធនាការ នៅមុនពេលសម្រាលបានកូនប្រុសរបស់លោកស្រី នាថ្ងៃទី១ ខែឧសភា ដោយទទួលបានការស្វាគមន៍យ៉ាងកក់ក្ដៅរីករាយពីអ្នកគាំទ្រ នៅឯកន្លែងជួបជុំគ្នា ក្រោមកម្ដៅថ្ងៃក្ដៅខ្លាំង បើទោះបីជាមានផ្ទៃពោះជិតដល់ថ្ងៃសម្រាលហើយក៏ដោយ។
កាលពីថ្ងៃសុក្រ លោកស្រីបាននិយាយទៅកាន់អ្នកគាំទ្ររាប់រយនាក់ ក្នុងទីក្រុងបាងកក តាមរយៈបណ្តាញវីដេអូ ដោយជំរុញពួកគេនាំគណបក្សភឿថៃឲ្យទទួលបានជ័យជម្នះដ៏ច្រើនលើសលប់ ដើម្បីបំផ្លាញនូវការប៉ុនប៉ងរបស់ពួកយោធា ក្នុងការរារាំងគណបក្សនេះមិនឲ្យទទួលបានអំណាច។
ប្រសិនបើទទួលបានជោគជ័យ លោកស្រី Paetongtarn នឹងក្លាយជាសមាជិកទី៤ នៃគ្រួសារ ដែលបានក្លាយជានាយករដ្ឋមន្ត្រី បន្ទាប់ពីលោក Thaksin ម្តាយមីងលោកស្រី Yingluck និងឪពុកមារបស់លោកស្រី លោក Somchai Wongsawat៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
