ក្រុមមន្រ្តីការបរទេសទួរគី ស៊ីរី រុស្ស៊ី និងអ៊ីរ៉ង់ បានជួបពិភាក្សាការងារកាលពីថ្ងៃពុធនៅទីក្រុងម៉ូស្គូ ដែលជាជំនួបចរចាកម្រិតខ្ពស់បំផុតចាប់តាំងពីសង្រ្គាមស៊ីរី ដើម្បីបង្កើតទំនាក់ទំនងឡើងវិញរវាងទីក្រុងអង់ការ៉ា និងទីក្រុងដាម៉ាស់ ។

នៅលើបណ្តាញព័ត៌មានសង្គម Twitter រដ្ឋមន្រ្តីការបរទេសទួរគី លោក Mevlut Cavusoglu បាននិយាយថា អំឡុងជំនួបនេះ លោកបានធ្វើការសង្កត់ធ្ងន់ពីតម្រូវការកិច្ចសហប្រតិបត្តិការក្នុងការប្រយុទ្ធប្រឆាំងនឹងអំពើភេរវកម្ម និងធ្វើការរួមគ្នាបង្កើតមូលដ្ឋានសម្រាប់ការវិលត្រឡប់មកវិញរបស់ពលរដ្ឋស៊ីរី ។

ទួរគី ទទួលជនភៀសខ្លួនជាង ៣,៥លាននាក់ មកពីប្រទេសជិតខាងស៊ីរី ។

លោក Cavusoglu បាននិយាយផងដែរថា ការធ្វើឲ្យដំណើរការនយោបាយឆ្ពោះទៅមុខនៅស៊ីរី និងការការពារបូរណភាពទឹកដីស៊ីរី គឺជាបញ្ហាផ្សេងទៀតដែលត្រូវបានពិភាក្សា ។

ទួរគីដែលជាសមាជិកអង្គការណាតូ បានគាំទ្រក្រុមនយោបាយប្រដាប់អាវុធប្រឆាំងនឹងប្រធានាធិបតីស៊ីរី លោក Bashar al-Assad អំឡុងសង្រ្គាមស៊ីវិលរយៈពេល ១២ឆ្នាំ ហើយពួកគេ បានបញ្ជូនទាហានរបស់ខ្លួនចូលទៅកាន់តំបន់ភាគខាងជើងស៊ីរី ។

គួរឲ្យដឹងថា នៅតំបន់ភាគពាយព្យស៊ីរី រួមមានទាំងដែនដីមួយចំណែកគ្រប់គ្រងដោយក្រុមជីវពល ដែនដីគ្រប់គ្រងដោយក្រុមប្រដាប់អាវុធប្រកាន់តឹង និងក្រុមឧទ្ទាមជីហាដ ដែលគាំទ្រដោយទួរគី។

គេនៅមិនទាន់ដឹងច្បាស់ភ្លាមៗនោះទេថាតើជំនួយមួយនេះ បង្កើតបានលទ្ធផលជាផ្លែផ្កា រឹងមាំងអ្វីខ្លះ ។

រដ្ឋមន្រ្តីការពារជាតិស៊ីរី និងទួរគី មានជំនួបផងដែរកាលពីខែធ្នូ នៅទីក្រុងម៉ូស្គូ។ ទីក្រុងម៉ូស្គូ គឺជាសម្ព័ន្ធមិត្តដ៏សំខាន់របស់លោក Assadហើយរុស្ស៊ី បានជំរុញឲ្យមានការផ្សះផ្សាគ្នាឡើងវិញជាមួយទីក្រុងអង់ការ៉ា ប៉ុន្តែទីក្រុងដាម៉ាស់ បានទាមទារឲ្យមានការដកទាហានទួរគីទាំងស្រុងចេញពីប្រទេសពួកគេ ដើម្បីស្តាទំនាក់ទំនងឡើងវិញ ៕