ប្រព័ន្ធផ្សព្វផ្សាយក្នុងតំបន់បានរាយការណ៍កាលពីថ្ងៃព្រហស្បតិ៍ ដោយដកស្រង់សំដីរបស់អ្នកនាំពាក្យរដ្ឋាភិបាលថា ទឹកជំនន់ និងបំណាក់ដី ដែលនាំមកដោយភ្លៀងធ្លាក់ខ្លាំងនៅសាធារណៈរដ្ឋប្រជាធិបតេយ្យកុងហ្គោភាគខាងកើត បណ្តាលឲ្យមនុស្សយ៉ាងហោចណាស់ ៤៣៨នាក់ស្លាប់។

យោងតាមរបាយការណ៍ផ្លូវការ បានឲ្យដឹងថា សាកសពជនរងគ្រោះ ភាគច្រើនត្រូវបានរកឃើញ នៅភូមិ Bushushu និងភូមិ Nyamukubi ដែលភូមិទាំងពីរស្ថិតក្នុងខេត្ត Kivu ខាងត្បូង បានទទួលរងគ្រោះយ៉ាងខ្លាំងដោយទឹកជំនន់បណ្តាលមកពីភ្លៀងធ្លាក់ខ្លាំង។

អ្នកនាំពាក្យ លោក Patrick Muyaya បាននិយាយថា ចំនួនអ្នកបាត់ខ្លួននៅពុំទាន់ដឹងនៅឡើយ។ចាប់តាំងពីសប្តាហ៍មុន ភ្លៀងធ្លាក់ខ្លាំងត្រូវបានរាយការណ៍នៅផ្នែកនេះរបស់ប្រទេសនេះ ជាកន្លែងដែលបំណាក់ដី ជាទៀតទាត់បានឆក់យកជីវិតពលរដ្ឋច្រើននាក់ក្នុងអំឡុងរដូវភ្លៀង។

យោងតាមអង្គការសហប្រជាជាតិបានឲ្យដឹងថា លំនៅឋានជិត៣ពាន់ខ្នងបានរងផលប៉ះពាល់ ដែលក្នុងចំណោមនេះប្រមាណ ១.២០០ខ្នងត្រូវបានបំផ្លញទាំងស្រុង។

អាជ្ញាធរតំបន់បានប៉ាន់ប្រមាណថា មនុស្សជាង ៥ពាន់នាក់នៅបាត់ខ្លួននៅឡើយ។រដ្ឋាភិបាលកណ្តាលបានបញ្ជូនគណៈប្រតិភូរដ្ឋមន្ត្រីនិងមន្ត្រីផ្សេងទៀត ចុះពិនិត្យភូមិដែលរងផលប៉ះពាល់ភាគច្រើនទំាងពីនេះ នៅខេត្ត Kivu ខាងត្បូង។

ក្រុមរដ្ឋមន្ត្រីបានសំដែងការសោកស្តាយជាមួយប្រជាជនដែលរងទុក្ខលំបាក និងបាននាំយកជំនួយ​មនុស្សធម៌មកឲ្យពួកគេ រួមមានស្បៀងអាហារ សម្លៀកបំពាក់ និងម្ឈូស។

អ្នកនៅរស់រានមានជីវិត បាននិយាយថា ទឹកជំនន់ និងបំណាក់ដី បានបណ្តាលឲ្យមាន​ការ​ខូចខាតធ្ងន់ធ្ងរ និងព្រួយបារម្ភថា ជំនួយមនុស្សធម៌ពុំគ្រប់គ្រាន់​ដើម្បីផ្គត់ផ្គង់ពួកគេឆ្លងកាត់​គ្រាលំបាកនេះទេ។