ភ្នំពេញ៖ អនុវត្តតាមអនុសាសន៍របស់សម្តេចតេជោនាយករដ្ឋមន្ត្រី ឯកឧត្តមរដ្ឋមន្ត្រី ជា វ៉ាន់ដេត បានណែនាំឱ្យរៀបចំកម្មវិធីកសាងសមត្ថភាពមន្ត្រីរាជការក្រសួងប្រៃសណីយ៍ និងទូរគមនាគមន៍ (ក.ប.ទ.) ក្នុងគោលដៅអភិវឌ្ឍន៍ និងបន្តពង្រឹងសមត្ថភាពមន្ត្រី ឱវាទលើជំនាញវិជ្ជាជីវៈ និងបច្ចេកទេសឌីជីថល។

ផេកផ្លូវការរបស់ក្រសួងប្រៃសណីយ៍ ចេញផ្សាយនៅថ្ងៃទី១២ ខែឧសភានេះ បានឲ្យដឹងថា សម្រាប់គោលដៅអភិវឌ្ឍន៍ និងបន្តពង្រឹងសមត្ថភាពមន្ត្រីទាំងអស់នេះ រួមមាន៖ការផ្តល់​អាហារូបករណ៍​សិក្សាថ្នាក់បរិញ្ញាបត្រជាន់ខ្ពស់ ការរៀបចំកម្មវិធីបណ្តុះបណ្តាលជំនាញ​បច្ចេកវិទ្យាឌីជីថល​ចាប់ពីជំនាញមូលដ្ឋានដល់ជំនាញឯកទេស និងការរៀបចំសិក្ខាសាលា​បណ្តុះបណ្តាល និងចែករំលែកបទពិសោធការអនុការងារជាក់ស្តែងជាដើម ដើម្បីបង្កើនប្រសិទ្ធភាព​នៃការផ្តល់សេវាសាធារណៈជូនប្រជាពលរដ្ឋដល់មូលដ្ឋាន និងការរួមចំណែកដើម្បីអភិវឌ្ឍន៍ក្រសួង និងប្រទេសជាតិឱ្យរីកចម្រើនបន្ថែមទៀត។

ប្រភពដដែល បានបញ្ជាក់ថា គិតពីថ្ងៃទី៩ ដល់១១ ខែឧសភា ឆ្នាំ២០២៣ ក្រសួងបានរៀបចំកម្មវិធី​បណ្តុះបណ្តាលពង្រឹងសមត្ថភាពអនុវត្តការងារនៅមន្ទីរប្រៃសណីយ៍​ និងទូរគមនាគមន៍ (ជំហានទី២) ដែលជាសិក្ខាសាលាតំបន់ទី២ នៅមន្ទីរអប់រំ យុវជន និងកីឡាខេត្តប៉ៃលិន ជូនសិក្ខាកាមចំនួន ៨៤រូប ដែលជាមន្ដ្រីរាជការមកពីមន្ទីរប្រៃសណីយ៍ និងទូរគមនាគមន៍ ១៤ខេត្ត។

ចំពោះកម្មវិធីបណ្ដុះបណ្តាលនេះ ត្រូវបានរៀបចំឡើងក្នុងគោលបំណង៖ ដើម្បីបង្កើនចំណេះដឹងថ្មីៗ​ពីបច្ចេកវិទ្យាឌីជីថល និងពង្រឹងសមត្ថភាពជំនាញ ​និងបទពិសោធពាក់ព័ន្ធវិស័យប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍និងព័ត៌មាន សម្រាប់អនុវត្តការងារប្រចាំថ្ងៃដល់​មន្ត្រីរាជការមន្ទីរ ​ដើម្បីបម្រើសេវាសាធារណៈជូនប្រជាពលរដ្ឋឱ្យកាន់តែល្អប្រសើរ ឆាប់រហ័សប្រកបដោយប្រសិទ្ធភាពខ្ពស់។

បន្ថែមពីនេះ ដើម្បីផ្សព្វផ្សាយអំពីគោលនយោបាយរដ្ឋាភិបាលឌីជីថល គោលនយោបាយ​ប្រៃសណីយ៍ ច្បាប់ស្ដីពីទូរគមនាគមន៍ និងលិខិតបទដ្ឋានគតិយុត្តពាក់ព័ន្ធផ្សេងៗ ដើម្បីដោះស្រាយ​នូវរាល់​បញ្ហាប្រឈមនានាដែលកំពុងជួបប្រទះ និងបង្កើតឱ្យមាន​យន្តការចែករំលែកបទ​ពិសោធន៍ល្អៗ ដែលបានមកពីការអនុវត្តការងារ និងផ្សារភ្ជាប់ទំនាក់ទំនងយ៉ាង​ជិតស្និទ្ធរវាង​មន្ត្រីថ្នាក់ដឹកនាំនៅថ្នាក់ជាតិ និងមន្ត្រីរាជការថ្នាក់ក្រោមជាតិ។

តាមការបញ្ជាក់របស់ក្រសួងប្រៃសណីយ៍ ​បានឲ្យដឹងទៀតថា កម្មវិធីបណ្តុះបណ្ដាលស្ដីពីការ​ពង្រឹង​សមត្ថភាពអនុវត្តការងារនៅមន្ទីរប្រៃសណីយ៍ និងទូរគមនាគមន៍ (ជំហានទី២) សម្រាប់មន្ទីរ​ប្រៃសណីយ៍ និងទូរគមនាគមន៍ទាំង ២៤ បាននិងកំពុងរៀបចំ ​ចាប់ពីថ្ងៃទី២៥ ខែមេសា រហូតដល់ថ្ងៃទី២៥ ​ខែឧសភា ឆ្នាំ២០២៣ ដែលធ្វើនៅ ៤ទីតាំង ​ដូចជាខេត្តសៀមរាប ប៉ៃលិន កំពង់ធំ និងខេត្តព្រះសីហនុ៕