រដ្ឋមន្ត្រីការពារជាតិនៃប្រទេសទាំងពីរ បាននិយាយកាលពីថ្ងៃព្រហស្បតិ៍ (១១ ឧសភា) ថា វេណេហ្ស៊ុយអេឡា និងកូឡុំប៊ីនឹងបង្កើនចំនួនទាហានដែលឈរជើងនៅតាមព្រំដែនរួមរបស់ខ្លួននៅឯច្រកឆ្លងកាត់ក្រៅផ្លូវការដែលក្រុមឧក្រិដ្ឋជនប្រដាប់អាវុធប្រើប្រាស់ ដើម្បីប្រតិបត្តិការជួញដូរគ្រឿងញៀនជាញឹកញាប់។

រដ្ឋមន្ត្រីការពារជាតិកូឡុំប៊ី លោក Ivan Velasquez បាននិយាយនៅក្នុងការផ្សាយតាមទូរទស្សន៍រដ្ឋវេណេស៊ុយអេឡាថារដ្ឋមន្ត្រីទាំងពីរ បានជួបប្រជុំគ្នានៅទីក្រុងការ៉ាកាស ដើម្បីពិភាក្សាអំពីការគំរាមកំហែងផ្នែកសន្តិសុខពីបណ្ដាក្រុម "ដែលឆ្លងកាត់ព្រំដែន និងធ្វើសកម្មភាពឧក្រិដ្ឋកម្មទាំងក្នុងទឹកដីវេណេហ្ស៊ុយអេឡា និងប្រទេសកូឡុំប៊ី" ។

ក្រុមមន្ត្រីទាំងនោះ មិនបានបញ្ជាក់ថានឹងបញ្ជូនទាហានប៉ុន្មាននាក់ហើយនៅពេលណា ទៅព្រំដែននោះទេ។ ព្រំដែនមានចម្ងាយប្រហែល ២.២០០ គីឡូម៉ែត្រ (១.៤០០ ម៉ាយ) ហើយភាគច្រើនឆ្លងកាត់ព្រៃដាច់ស្រយាល។

លោក Velasquez ក៏បានពិភាក្សាអំពីកិច្ចខិតខំប្រឹងប្រែងរបស់រដ្ឋាភិបាលកូឡុំប៊ីក្នុងការ "បំផ្លាញប្រភពហិរញ្ញវត្ថុរបស់ក្រុមឧក្រិដ្ឋជនជាមួយនឹងកម្លាំងអតិបរមាដែលអាចធ្វើទៅបាន" ដែលជាមធ្យោបាយធ្វើឱ្យពួកគេចុះខ្សោយ។

វេណេហ្ស៊ុយអេឡា និងកូឡុំប៊ី បានបង្កើតទំនាក់ទំនងឡើងវិញកាលពីខែសីហាឆ្នាំមុន បន្ទាប់ពីប្រធានាធិបតីកូឡុំប៊ីលោក Gustavo Petro ដែលជាមេដឹកនាំឆ្វេងនិយមបានចូលកាន់តំណែង។

រដ្ឋមន្ត្រីការពារជាតិវេណេហ្ស៊ុយអេឡា លោក Vladimir Padrino បាននិយាយថា ប្រទេសទាំងពីរបានធ្វើការរួមគ្នាក្នុងការ"ស្រោចស្រង់ទំនាក់ទំនងដែលបានប្រេះឆាដើម្បីឆ្ពោះទៅមុខ"៕