អង្គការសុខភាពពិភពលោក ឬ WHO កាលពីថ្ងៃព្រហស្បតិ៍ (ទី១១ ខែឧសភា) បានប្រកាសថា ជំងឺ Mpox លែងជាគ្រាអាសន្នសុខភាពសកលទៀតហើយ ដែលមានរយៈជិតមួយឆ្នាំ បន្ទាប់ពីជំងឺដែលពីមុនត្រូវបានគេស្គាល់ឈ្មោះថា ជំងឺអុតស្វា បានចាប់ផ្តើមរីករាលដាលពាសពេញពិភពលោក។

បន្ទាប់ពីចំនួនករណីធ្លាក់ចុះ ប្រធាន WHO លោក Tedros Adhanom Ghebreyesus បានប្រាប់សន្និសីទសារព័ត៌មានតាមប្រព័ន្ធអនឡាញថា រូបលោករីករាយក្នុងការប្រកាសឲ្យដឹងថា រូបលោកទទួលយកការណែនាំរបស់គណៈកម្មាធិការសង្គ្រោះបន្ទាន់នៃទីភ្នាក់ងារអង្គការសហប្រជាជាតិស្តីពីជំងឺ Mpox ដើម្បីលុបចោលកម្រិតប្រកាសអាសន្នខ្ពស់បំផុតរបស់ខ្លួន។

ការប្រកាសនេះ បានធ្វើឡើងត្រឹមតែមួយសប្តាហ៍ បន្ទាប់ពី WHO បាននិយាយថា វីរុស COVID-19 ក៏លែងជាភាពអាសន្នផ្នែកសុខភាពសាធារណៈនៃការព្រួយបារម្ភអន្តរជាតិ (PHEIC) ទៀតហើយ។

លោក Tedros បានថ្លែងថា៖ «ទោះបីជាគ្រាអាសន្ននៃជំងឺ Mpox និងវីរុស COVID-19 ត្រូវបានបញ្ចប់ទាំង២ ដូចគ្នាក៏ដោយ ក៏ការគំរាមកំហែងនៃរលកឆ្លងរាលដាលដែលកើតមានឡើងវិញ នៅតែមានសម្រាប់ជំងឺទាំង២។ វីរុសទាំង២ នៅតែបន្តចម្លង និងនៅតែបន្តផ្ដាច់ជីវិតមនុស្ស»។

លោក បានបញ្ជាក់បន្ថែម ដោយអំពាវនាវឲ្យគ្រប់ប្រទេសទាំងអស់បន្តប្រុងប្រយ័ត្នថា៖ «ជំងឺ Mpox បន្តបង្កបញ្ហាប្រឈមផ្នែកសុខភាពសាធារណៈធំៗ ដែលត្រូវការការឆ្លើយតបដ៏រឹងមាំ សកម្ម និងនិរន្តរភាព»។

WHO បានប្រកាសថា ជំងឺ Mpox គឺជាគ្រាអាសន្នផ្នែកសុខភាពសាធារណៈនៃកង្វល់អន្តរជាតិ (PHEIC) នៅក្នុងខែកក្កដា។ ប៉ុន្តែចំនួនអ្នកឆ្លងជំងឺ ដែលបណ្តាលឲ្យក្តៅខ្លួន ឈឺសាច់ដុំ និងពងបែកធំៗ បានធ្លាក់ចុះជាបន្តបន្ទាប់ ចាប់តាំងពីពេលនោះមក។

យោងតាមការការកត់ត្រារបស់អង្គការសុខភាពពិភពលោក បានឲ្យដឹងថា មានច្រើនជាង ៨៧.០០០ករណី និងការស្លាប់ចំនួន ១៤០នាក់ ត្រូវបានរាយការណ៍ពីប្រទេសចំនួន ១១១ ក្នុងអំឡុងពេល នៃការផ្ទុះឆ្លងរាលដាលជាសកល៕