ភ្នំពេញ៖ នៅព្រឹកថ្ងៃទី០៦ ខែឧសភា ឆ្នាំ២០២១នេះ គឺជាថ្ងៃទី២ហើយ ដែលប្រជាពលរដ្ឋ រស់នៅក្នុងសង្កាត់ព្រែកកំពឹស ខណ្ឌដង្កោ រាជធានីភ្នំពេញ បានមកទទួលការចាក់វ៉ាក់សាំងការពារជំងឺកូវីដ១៩ ពីក្រុមគ្រូពេទ្យរបស់កងទ័ពនៅក្នុងយុទ្ធនាការទ្រង់ទ្រាយធំនេះ។ ដែលទីតាំងទទួលចាក់វ៉ាក់សាំងនេះធ្វើឡើងនៅក្នុងសាលាបឋមសិក្សា អ្នកឧកញ៉ាមហាភក្តី ហ៊ុន នាង ព្រែកកំពឹស។
បើតាមលោក អ៊ុយ ស៊ុន សមាជិកក្រុមប្រឹក្សាខណ្ឌដង្កោ និងអនុប្រធានក្រុមការងារចុះជួយសង្កាត់ព្រែកកំពឹសបានអោយដឹងថា នៅក្នុងសង្កាត់នេះមានប្រជាពលរដ្ឋចំនួន ៨០០០នាក់ មកពី៦ភូមិ ហើយថ្ងៃនេះជាថ្ងៃទី២ ដែលប្រជាពលរដ្ឋនៅក្នុងសង្កាត់ព្រែកកំពឹសនេះ បានមកទទួលការចាក់ថ្នាំវ៉ាក់សាំងការពារជំងឺកូវីដ១៩ ពីក្រុមគ្រូពេទ្យកងទ័ព ដែលជាប្រភេទថ្នាំវ៉ាក់សាំង ស៊ីណូវ៉ាក់ សម្រាប់ចាក់ជូនប្រពលរដ្ឋដែលមានអាយុចាប់ពី១៨ឆ្នាំឡើងទៅ។ លោក អ៊ុយ ស៊ុន បន្តថា កាលពីថ្ងៃទី១ម្សិលមិញ មានប្រជាពលរដ្ឋស្ម័គ្រចិត្តមកចាក់វ៉ាក់សាំងមានចំនួន ១០០០ នាក់គត់ ហើយថ្ងៃទី២នេះ លោកសង្ឃឹមថានឹងមានការកើនឡើង។ ដោយជាគោលការណ៍របស់សង្កាត់ ក្នុងមួយថ្ងៃចាក់អោយ បាន ១២០០នាក់។
តាមរយៈការផ្តល់បទសម្ភាសន៍ជាមួយ BTV News ប្រជាពលរដ្ឋដែលបានចូលរួមចាក់វ៉ាក់សាំងបានឲ្យដឹងថា ពួកគាត់សប្បាយចិត្តខ្លាំងណាស់ ដោយទទួលបានចាក់វ៉ាក់សាំងការពារជម្ងឺកូវីដ១៩ ដោយស្ម័គ្រចិត្ត មិនមានការបង្ខិតបង្ខំ និងមិនមានការព្រួយបារម្មអ្វីឡើយអំពីថ្នាំវ៉ាក់សាំង។ ដោយពួកគាត់អះអាងថា អ្វីដែលពិសេសនោះ គឺបានការពារខ្លួនឯងផ្ទាល់ និងក្រុមគ្រួសារព្រមទាំងសង្គមជាតិទាំងមូល។
កញ្ញា ស៊ុន ឌីណូ តំណាងយុវជន ស ស យ ក នៅសង្កាត់ព្រែកកំពឹស បានអោយដឹងថា ជាការកត់សំគាល់រយៈពេលពីរថ្ងៃមកនេះ ឃើញថាប្រជាពលរដ្ឋនៅក្នុងសង្កាត់នេះ មានការអញ្ជើញមកចាក់វ៉ាក់សាំងច្រើន តាមអញ្ជើញរបស់អាជ្ញាធរ ភូមិ សង្កាត់ ហើយគាត់អញ្ជើញមកដោយស្ម័គ្រចិត្ត មិនមានការបង្ខិតបង្ខំឡើយ។
កញ្ញា ឌីណូ មានអោយដឹងទៀតថា រហូតមកដល់ពេលនេះប្រជាពលរដ្ឋ ពួកគាត់មានការយល់ដឹងបានច្រើន ទាក់ទងនិងវិធានការ ការពារជំងឺកូវីត-១៩ ដូចជាការ ពាក់ម៉ាស់ បាញ់អាល់កុលលាងសម្អាតដៃ ការរក្សាគម្លាតសុវត្ថិភាពជាដើម។
សូមបញ្ជាក់ថាកម្ពុជា បានកំណត់យកការចាក់វ៉ាក់សាំង ជាយុទ្ធសាស្ត្រក្នុងការបង្កើតភាពសាំទប់ស្កាត់ ការឆ្លងរាលដាលជំងឺកូវីដ១៩។ រាជធានីភ្នំពេញ និងខេត្តកណ្តាល ត្រូវបានសម្តេចតេជោ ហ៊ុន សែន ដាក់ចេញផែនការចាក់ជូនប្រជាពលរដ្ឋទូទៅឱ្យបានគ្រប់គ្នា។ កម្ពុជាបានចាប់ផ្តើមដំណើរការចាក់វ៉ាក់សាំងជូនប្រជាពលរដ្ឋចាប់ពីថ្ងៃទី១០ ខែកុម្ភៈ ឆ្នាំ២០២១មក។ ដោយគិតត្រឹមយប់ថ្ងៃទី០៥ ខែឧសភា ឆ្នាំ២០២១ ក្រសួងសុខាភិបាល និងក្រសួងការពារជាតិ បានចាក់វ៉ាក់សាំងការពារកូវីដ១៩ ជូនមន្ត្រីរាជការ ប្រជាពលរដ្ឋ និងកងកម្លាំងប្រដាប់អាវុធ នៅទូទាំងប្រទេសសរុបចំនួន ១,៥៦៥,២៩២នាក់ហើយ៕ អត្ថបទ៖ សំ ងីម