ភ្នំពេញ៖ ឯកឧត្តម ហ៊ុន ម៉ាណែត នាព្រឹកថ្ងៃទី ១៤ ខែឧសភានេះ បានបង្ហោះរូបថតជាមួយក្មេងប្រុសលក់ផ្កាម្នាក់ ដែលបានជួបនៅខេត្តបាត់ដំបង ដែលកាយវិការរបស់ក្មេងម្នាក់នេះ និងដំណើររឿងជីវិតរបស់គេបានធ្វើឱ្យឯកឧត្តមមានអារម្មណ៍រំភើបដោយមិនដឹងខ្លួន។

ឯកឧត្តមបញ្ជាក់ថា រូបថតដោយអត់ព្រៀងទុកប៉ុន្មានសន្លឹកនេះអោយខ្ញុំមានអារម្មណ៍រំភើបដោយមិនដឹងខ្លួន។

ឯកឧត្តមលើកឡើងថា ពេលកំពុងអង្គុយនៅក្នុងកម្មវិធីអាហារសាមគ្គីនៅខេត្តបាត់ដំបង កាលពីថ្ងៃសុក្រកន្លងទៅនេះ ខ្ញុំបានក្រឡេកមើលឃើញក្មួយប្រុសម្នាក់ ដែលកំពុងឈរមើលមកខ្ញុំពីចំងាយជាមួយផ្កាមួយបាច់នៅក្នុងដៃរបស់គាត់។

ឯកឧត្តមបន្តថា ខ្ញុំបានបក់ដៃហៅគាត់អោយចូលមកក្បែរដើម្បីសួរនាំអំពីគាត់ ហើយក៏ទិញផ្ការបស់​គាត់ទាំងអស់ដើម្បីចែកជូនប្អូនៗដែលនៅក្នុងកម្មវិធីនោះជាអនុស្សាវរីយ៍... ភ្លាមនោះគាត់បាន​សំពះអរគុណ ព្រមទាំងស្ទុះមកអោបខ្ញុំដោយទឹកមុខសប្បាយរីករាយ មុននឹងគាត់លាខ្ញុំចេញទៅ។

ឯកឧត្តមបញ្ជាក់ថា កាយវិការរបស់ក្មួយម្នាក់នេះនិងដំណើររឿងជីវិតរបស់គាត់ បានធ្វើអោយខ្ញុំមានអារម្មណ៍រំភើបដោយមិនដឹងខ្លួន។

ឯកឧត្តមថ្លែងថា ដោយសារគាត់ប្រញាប់ត្រឡប់ទៅផ្ទះវិញក្រោយលក់ផ្កាអស់ ក្រុមការងារក៏មិនបានយកព័ត៌មានបន្ថែមពីគាត់ដែរ។ ខ្ញុំបានអោយក្រុមការងារស្រាវជ្រាវ​រកក្មួយប្រុសនេះ ដើម្បីពិនិត្យមើលស្ថានភាពក្រុមគ្រួសាររបស់គាត់ និងលទ្ធភាពដែលអាចជួយគាត់យ៉ាងណាខ្លះទៀត៕