កោះកុង៖ លោកជំទាវអភិបាលខេត្តកោះកុង និងក្រុមការងារជំនាញទទួលបន្ទុកគម្រោង បានចុះត្រួតពិនិត្យស្ថានភាពបច្ចុប្បន្ននៃការស្ថាបនាផ្លូវជាតិលេខ៤៨ ខណៈគិតត្រឹមខែមេសា កន្លងទៅ សម្រេចបាន ២៥.៥៧ភាគរយ។

លោកជំទាវ មិថុនា ភូថង អភិបាលខេត្តកោះកុង លោកស្រី អ៊ី នារីនេត អភិបាលរងខេត្ត និង​ក្រុមអ្នកជំនាញការសាងសង់ បានពិនិត្យពីស្ថានភាពជាក់ស្តែងនៃការស្ថាបនាកំណាត់ផ្លូវជាតិ​លេខ៤៨ ធ្វើឡើងប្រមាណ៥ទីតាំងផ្សេងៗ ចាប់ពីស្រុកស្រែអំបិល រហូតដល់ក្រុងខេមរភូមិន្ទ។

លោកស្រី អ៊ី នារីនេត អភិបាលរងខេត្តកោះកុង បានឱ្យដឹងនៅល្ងាចថ្ងៃទី១៤ ខែឧសភា ឆ្នាំ២០២៣ថា ដំណើរចុះពិនិត្យការដ្ឋានផ្លូវជាតិលេខ៤៨នេះ ​ក្នុងគោលបំណងដើម្បីដឹង​ពី​វឌ្ឍនៈភាពនៃសកម្មភាពស្ថាបនាផ្លូវបានដល់កម្រិតណា។ មានបញ្ហាប្រឈមអ្វីខ្លះ និង​អាចអនុវត្តសម្រេចបានទៅតាមផែនការគម្រោងដែរ ឬយ៉ាងណា។

បើតាមលោកស្រី អ៊ី នារីនេត គិតត្រឹមខែមេសា ឆ្នាំ២០២៣ ក្រុមការងារជំនាញ បានអនុវត្ត​គម្រោងស្ថាបនាផ្លូវជាតិលេខ៤៨ បាន ២៥.៥៧ភាគរយហើយ ដោយអាជ្ញាធរខេត្តបន្តជំរុញ​ធ្វើ​យ៉ាងដល់​ក្រុមអ្នកជំនាញ​បង្កើន​ពន្លឿន​សាងសង់​ ខណៈរដូវវស្សាចូលដល់។

គួរកត់សម្គាល់ថា ​កំណាត់ផ្លូវជាតិលេខ៤៨ ​មានស្ថានភាពបត់បែន ​និងឡើងចុះចំណាតច្រើន ដោយ​ទីតាំងខ្លះត្រូវប្រើពេលវេលាជីកកាយជ្រលងថ្មធំៗ ​ទីតាំងខ្លះតម្រូវឱ្យមានការវាងចំណាតកោងខ្លាំង និងជា​ពិសេសរដូវវស្សាពិបាកសាងសង់ ​ទើបធ្វើឱ្យដំណើរការហាក់យឺតយ៉ាវបន្តិច។

គម្រោងសាងសង់លើកកម្រិតគុណភាពផ្លូវជាតិលេខ៤៨ ​ប្រវែង១៤៨គីឡូម៉ែត្រ ពីចំណុចប្រសព្វផ្លូវ​ជាតិ​លេខ៤ អូរជ្រៅ-ក្រុងខេមរភូមិន្ទ ខេត្តកោះកុង ​ក្រោមជំនួយរបស់រដ្ឋាភិបាលកូរ៉េខាងត្បូង ចំនួន៧៨ដុល្លារអាម៉េរិក​ ត្រូវបានចាប់ផ្តើមដំណើរការ ​កាលពីថ្ងៃទី៣ ​ខែមករា ឆ្នាំ២០២២។

កន្លងទៅឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ ​និងដឹកជញ្ជូន​ ធ្លាប់អះអាងថា ផ្លូវជាតិ​លេខ៤៨នេះ នឹងជួយជំរុញ ​សក្តានុពល​តំបន់ទេសចរណ៍នៅក្នុងខេត្តកោះកុងបន្ថែមទៀត ក៏ដូចជា​តំបន់ទេសចរណ៍គីរីសាគរ ​ដែលជាគោលដៅទេសចរណ៍ដ៏សំខាន់មួយ នៅភាគនិរតីនៃកម្ពុជា។

តាមរយៈផ្លូវជាតិដ៏មានសក្តានុពលនេះ ​ក៏នឹងជួយជំរុញដល់ការអភិវឌ្ឍសេដ្ឋកិច្ច ក្នុងតំបន់​ជាប់ព្រំប្រទល់ជាមួយប្រទេសជិតខាង​ ដោយរំពឹងបាននូវការទាក់ទាញវិនិយោគិន និង​ជំរុញការនាំចេញនៅតំបន់សេដ្ឋកិច្ចពិសេសចំនួន៤ ​ដែលស្ថិតនៅតាមបណ្តោយផ្លូវនេះ៕ អត្ថបទ៖ ឈឹម មករា