យេម៉ែន៖ ប្រជាពលរដ្ឋយេម៉ែន ចេញក្រៅរាល់ថ្ងៃដើម្បីធ្វើការ និងឈានដល់តម្រូវការរស់នៅប្រចាំថ្ងៃរបស់ពួកគេ។
ជាមួយនឹងវ៉ាក់សាំងស្ដួចស្ដើង និងគ្មានវិធានការប្រុងប្រយ័ត្ន ករណីឆ្លងជំងឺ COVID-19នៅក្នុងប្រទេសមួយនេះ ហក់ឡើងខ្ពស់ខ្លាំង។
នៅមន្ទីរពេទ្យមួយកន្លែង ស្ថិតក្នុងទីក្រុងតៃហ្ស៍ ក្រុមគ្រូពេទ្យមានការព្រួយបារម្ភជាខ្លាំងចំពោះអ្នកជំងឺ ជាពិសេសអ្នកជំងឺលាងឈាមដែលងាយរងគ្រោះដោយសារជំងឺ COVID-19។
លោកហ្វាមី អាល់ ហាណានី គឺជាប្រធានផ្នែកលាងឈាម បាននិយាយថា ពួកយើងត្រូវការការព្យាបាលដ៏ត្រឹមត្រូវសម្រាប់អ្នកជំងឺ COVID-19។
ក្រុមគ្រូពេទ្យគ្មានព្រំដែន ដែលជាក្រុមជំនួយអន្តរជាតិ បាននិយាយកាលពីខែមីនាថា ពួកគេបានមើលឃើញលំហូរអ្នកជំងឺ COVID-19 ធ្ងន់ធ្ងរដ៏គំហក់នៅក្នុងប្រទេសយេម៉ែន ដែលកំពុងញាំញីដោយសារសង្គ្រាម ស្របពេលដែលរលកទី២នៃករណីឆ្លងវីរុស ធ្វើឲ្យអន្តរាយដល់ប្រព័ន្ធសុខភាពនៅក្នុងប្រទេសមួយនេះ ។
លោក រ៉ាហ្គេ អាល់ ម៉ាលីគី គឺជាអគ្គនាយកការិយាល័យក្រសួងសុខាភិបាលក្រុងតៃហ្ស៍ បាននិយាយថា បញ្ហាកាន់តែធ្ងន់ធ្ងរទៅ ។ ប្រព័ន្ធថែទាំងសុខភាព កំពុងរងផលប៉ះពាល់ខ្លាំង ។
លោកបន្តថា ទីក្រុងតៃហ្ស៍ បានរាយការណ៍ករណីឆ្លងថ្មីជំងឺ COVID-19 ចំនួន ៨៥៧នាក់ ក្នុងរយៈពេល ២ខែ និង១០ថ្ងៃកន្លងមកនេះ ប៉ុន្តែចំនួនអ្នកឆ្លងជំងឺ នៅតែបន្តកើនឡើង។
លោកបញ្ជាក់ទៀតថា ទីក្រុងរបស់លោករកឃើញករណីស្លាប់ ១០០នាក់ផងដែរ៕ អត្ថបទ៖ សារ៉ាត់