​​បេសកជន​ពិសេស​ទទួលបន្ទុក​ការដកខ្លួន​ចេញ​របស់​ប្រទេស​រុស្ស៊ី បាន​និយាយ​នៅក្នុង​សុន្ទរកថា ដែល​បានចេញ​ផ្សាយ​នៅ​ព្រឹក​ថ្ងៃ​ចន្ទ​នេះ​ថា សន្ធិសញ្ញា​កងកម្លាំងប្រដាប់អាវុធ​អឺរ៉ុប ដែល​ទីក្រុង​មូ​ស្គូ​នឹងត្រូវ​ដកខ្លួន​ចេញ គឺ​ផ្ទុយ​ពី​ផលប្រយោជន៍​សន្តិសុខ របស់​ប្រទេស​រុស្ស៊ី​។

​សភា​របស់​រុស្ស៊ី នឹងត្រូវ​សម្រេច​នៅ​ថ្ងៃ​ចន្ទ​នេះ​ថា​នៅពេលណា​ត្រូវ​ប្រកាស​ជា​ផ្លូវការ​សន្ធិសញ្ញា​ស្តីពី កងកម្លាំងប្រដាប់អាវុធ​រួម នៅ​អឺរ៉ុប (CFE) បន្ទាប់ពី​មាន​បទបញ្ជា​របស់​ប្រធានាធិបតី​លោក Vladimir Putin កាលពី​ថ្ងៃទី​១០ ខែឧសភា​។

​អនុរដ្ឋមន្ត្រី​ការបរទេស​លោក Sergei Ryabkov បាន​និយាយ​នៅក្នុង​បទសម្ភាសន៍​មួយ​ជាមួយ​កាសែត Parliamentskaya Gazeta ដែល​បានចេញ​ផ្សាយ​ប្រចាំ​សប្តាហ៍​ដោយ​សភា​របស់​រុស្ស៊ី​ថា ការ​ស្រមៃ​ណាមួយ​នៃ​អ្នក​ទាំងឡាយណា​ដែល​នៅតែ​សង្ឃឹមថា រុស្ស៊ី​នឹង​វិល​ត្រលប់​មករក​សន្ធិសញ្ញា​នេះ​វិញ ពួកគេ​នឹង​លែងមានទៀតហើយ​។

​ដោយសារតែ​ស្ថានភាព​មានការ​ផ្លាស់ប្តូរ សន្ធិសញ្ញា​កងកម្លាំងប្រដាប់អាវុធ​រួម (CFE) គឺ​ផ្ទុយទៅនឹង​ផលប្រយោជន៍​រួម​របស់​យើង​។ បច្ចុប្បន្ន ការពិត​ជាក់ស្តែង​នេះ​នឹងត្រូវ​បានទទួល​ស្គាល់​នៅក្នុង​ប្រទេស​លោកខាងលិច​។​

​លោក Ryabkov ត្រូវបានតែងតាំង​កាលពី​សប្តាហ៍​មុន ដើម្បី​តំណាង​លោក Putin អំឡុង​ការធ្វើ​កំណត់ហេតុ​អង្គប្រជុំ​នៅ​សភា​ស្តីពី​ការប្រកាស​សន្ធិសញ្ញា​ដែល​មានបំណង​គ្រប់គ្រង​ចំនួន​កងកម្លាំង ដែល​ត្រូវ​ដាក់ពង្រាយ​តាម​សន្ធិសញ្ញា​ទីក្រុង​វ៉ា​សូវី និង​បណ្តា​ប្រទេស​សម្ព័ន្ធ​យោធា​NATO​។

​រុស្ស៊ី បានប្រកាស​នៅក្នុង​ឆ្នាំ​២០១៥​ថា ខ្លួន​កំពុង​បញ្ឈប់​ទាំងស្រុង​នូវ​ការចូលរួម​របស់ខ្លួន​នៅក្នុង​សន្ធិសញ្ញា​នេះ​៕