នគរបាលបាននិយាយកាលពីថ្ងៃអង្គារថា ខ្មាន់កាំភ្លើងដែលបានបាញ់សម្លាប់ស្ត្រីវ័យចំណាស់បីនាក់ នៅពេលរូបគេកំពុងដើរក្រវែលចុះឡើងនៅម្ដុំសង្កាត់មួយនៃរដ្ឋញូវម៉ិកស៊ីកូ ដោយបាញ់រះតម្រង់រថយន្ត ក្នុងសប្តាហ៍នេះ បានទិញកាំភ្លើងវែងស្របច្បាប់ ជាអាវុធមួយដើម ក្នុងចំណោមអាវុធទាំងបីដើម ដែលរូបគេបានប្រើក្នុងការបាញ់ទាំងកម្រោលនេះ ដោយការប្រព្រឹត្តរបស់យុវវ័យរូបនេះ មានរយៈពេល១ខែ បន្ទាប់ពីចូលដល់វ័យ១៨ឆ្នាំ។

ជនសង្ស័យ ដែលការបាញ់បោះដោយសេរី កាលពីព្រឹកថ្ងៃចន្ទ នៅតាមចន្លោះតំបន់លំនៅឋានមួយនៅក្រុង Farmington រដ្ឋញូវម៉ិកស៊ីកូ បានបញ្ចប់ នៅពេលដែល​នគរបាលបានបាញ់សម្លាប់ ​និងត្រូវបានគេកំណត់អត្តសញ្ញាណជាសាធារណៈ កាលពីថ្ងៃអង្គារថា​មានឈ្មោះ Beau Wilson វ័យ ១៨ឆ្នាំ ជាសិស្សនៅវិទ្យាល័យ Farmington។

នគរបាលបានឲ្យដឹងថា ក្មេងជំទង់ Wilson បានធ្វើដំណើរដោយថ្មើរជើងតាមកំណាត់ផ្លូវមួយ ដោយបាញ់មិនរើសមុខដាក់រថយន្តនានា ដែលក្នុងនោះ លំនៅឋានមួយចំនួន ក៏ត្រូវគ្រាប់កាំភ្លើងផងដែរ មុនពេលនគរបាលបានឃើញ និងដេញតាមជនល្មើសនៅខាង​ក្រៅព្រះវិហារមួយ​ រហូតដល់មានការបាញ់តគ្នាជាមួយ Wilson ដើម្បីបញ្ឈប់ការរុលទៅ​មុខរបស់រូបគេ។

ខ្សែវីដេអូបង្ហាញថា Wilson ដែលស្លៀកពាក់ពណ៌ខ្មៅ ដើរជុំវិញផ្លូវចូលព្រះវិហារកាន់អ្វីមួយដែល​ទំនង​ជាកាំភ្លើងជាមួយនឹងបង់អាចផ្ទុកគ្រាប់បានច្រើន មុនពេលដែលជនល្មើសត្រូវបាន​បាញ់សម្លាប់។

លោក Kyle Dowdy នាយរងនគរបាលក្រុង Farmington បានប្រាប់ក្នុងសន្និសីទសារព័ត៌មានខ្លី កាលពីថ្ងៃអង្គារថា ទង្វើរបស់ខ្មាន់កាំភ្លើង ​ទំនងចេះតែបាញ់ព្រាវៗប៉ុណ្ណោះដោយពុំមានគោលដៅ​ជាក់លាក់ ឬហេតុផល ដែលយើងអាចកំណត់អត្តសញ្ញាណបាននៅពេលនេះទេ។

នគរបាល បាននិយាយថា ​មនុស្សបួននាក់ផ្សេងទៀត នៅក្នុងរថយន្ត ដែលត្រូវបានវាយប្រហារ​ដោយកាំភ្លើង បានរងរបួស រួមជាមួយនឹងមន្ត្រីនគរបាលពីរនាក់ ដែលត្រូវបានអនុញ្ញាតឲ្យចេញ​ពីមន្ទីរពេទ្យក្នុងតំបន់ ចាប់តាំងពីពេលនោះមក៕