មនុស្សរាប់រយនាក់ ត្រូវគេបារម្ភថាបានស្លាប់ បន្ទាប់ពីព្យុះស៊ីក្លូនដ៏មានឥទ្ធិពល បានវាយប្រហារលើសហភាពមីយ៉ាន់ម៉ា កាលពីថ្ងៃអាទិត្យចុងសប្ដាហ៍នេះ ស្របពេលក្រុមសង្រ្គោះព្រមានពីការបាត់បង់ជីវិតមនុស្សដ៏ច្រើន ក្រោយព្យុះមួយក្នុងចំណោមព្យុះដ៏មានឥទ្ធិពលបំផុតជាច្រើនបានបោកបក់លើប្រទេសនេះ។ 

យោងតាមមេដឹកនាំក្នុងស្រុក ក្រុមមន្ត្រី និងសារព័ត៌មាននានា ចំនួនអ្នកស្លាប់សរុបបានកើនឡើងដល់៨១នាក់ គិតត្រឹមថ្ងៃអង្គារ ខណៈក្រុមអ្នកភូមិព្យាយាមចូលទៅកាន់លំនៅឋានដែលរងការបំផ្លិចបំផ្លាញ និងរង់ចាំជំនួយ និងការឧបត្ថម្ភផ្សេងៗ។  

ព្យុះស៊ីក្លូន Mocha បានវាយប្រហារពេញទំហឹងលើតំបន់ឆ្នេរសមុទ្ររបស់សហភាពមីយ៉ាន់ម៉ា កាលពីថ្ងៃអាទិត្យ ដោយបានបោកបក់ផ្ដួលផ្ទះសម្បែងប្រជាពលរដ្ឋ រំលើងដើមឈើ បង្គោលប្រព័ន្ធសេវាទូរស័ព្ទ និងបណ្ដាញទូរគមនាគមន៍យ៉ាងធ្ងន់ធ្ងរ នៅក្នុងរដ្ឋ Rakhine ហែកហួរដោយជម្លោះ  ជាទីដែលមនុស្សរាប់ម៉ឺននាក់ បានជម្លៀសបានភៀសខ្លួន។ 

រដ្ឋាភិបាលស្រមោលរបស់សហភាពមីយ៉ាន់ម៉ា បាននិយាយថា មនុស្សយ៉ាងហោចណាស់៤០០នាក់បានស្លាប់ និងមនុស្សដែលគេពុំបានដឹងចំនួនពិតប្រាកដជាច្រើនទៀតកំពុងបាត់ខ្លួន។សារព័ត៌មាន CNN មិនអាចផ្ទៀងផ្ទាត់ ទិន្នន័យនេះបានទេ ដោយសារតួលេខនេះផ្ទុយគ្នានឹងរបាយការណ៍ថ្មីៗដែលត្រូវបានរាយការណ៍ដោយទូរទស្សន៍ Myawaddy TV របស់យោធាមីយ៉ាន់ម៉ា ដែលបាននិយាយថា ចំនួនអ្នកស្លាប់ផ្លូវការ បានកើនឡើងដល់៣នាក់ និង១៣នាក់រងរបួស។ 

ប៉ុន្តែប្រភពនានា ដែលបានប្រាប់ទូរទស្សន៍ CNN  បាននិយាយថា សាកសពជនរងគ្រោះមូស្ល៊ីមរ៉ូហ៊ីងយ៉ា ត្រូវបានបញ្ចុះតាមប្រពៃណីសាសនា ៕