សន្តិសុខត្រូវបានរឹតបន្តឹងក្នុងកម្រិតខ្ពស់ នៅរាល់កិច្ចប្រជុំកំពូលរបស់ប្រទេសអ្នកមានទាំង៧ ឬ G7 ប៉ុន្តែប្រទេសម្ចាស់ផ្ទះជប៉ុន នៅឆ្នាំនេះ បានបញ្ជាក់កាន់តែច្បាស់ពីការរឹតបន្តឹងខ្លាំងជាគេបំផុត បន្ទាប់ពីមានការវាយប្រហារលើនាយករដ្ឋមន្ត្រី កាលពីខែមុន និងការធ្វើឃាតអតីតនាយករដ្ឋមន្ត្រី លោក Shinzo Abe ក្នុងឆ្នាំ២០២២។

បុគ្គលិកសន្តិសុខប្រហែល ២៤.០០០នាក់ ត្រូវបានគេរាយការណ៍ថា ត្រូវបានដាក់ពង្រាយទៅកាន់ទីក្រុងហ៊ីរ៉ូស៊ីម៉ា (Hiroshima ) ក្នុងអំឡុងកិច្ចប្រជុំកំពូលនេះ ដែលភាគច្រើនត្រូវបានបញ្ជូនមកពីផ្នែកផ្សេងទៀតនៃប្រទេស។

នៅមុនកិច្ចប្រជុំ ចាប់ពីថ្ងៃទី១៩ ដល់ថ្ងៃទី២១ ខែឧសភា នគរបាលល្បាត បាននិងកំពុងបង្កើនការត្រួតពិនិត្យ រវាងក្រុមអ្នកទេសចរនានា នៅក្នុងឧទ្យានសន្តិភាពដ៏ល្បីល្បាញរបស់ទីក្រុងភាគខាងលិច។ បុគ្គលិកសន្តិសុខក៏កំពុងជិះរថយន្តចុះឡើងតាមដងទន្លេ ដែលលាតសន្ធឹងតាមតំបន់នានា ដូចជាអគារដោមគ្រាប់បែកបរមាណូ (Atomic Bomb Dome) ដោយមានឧទ្ធម្ភាគចក្រហោះពីលើជាប្រចាំ។

វិធានការនេះបានពង្រីកទៅកាន់តែឆ្ងាយហួសពីទីក្រុង ដោយក្នុងនោះរួមទាំងទៅដល់រដ្ឋធានីតូក្យូ ដែលសារនៅលើប្រព័ន្ធរថភ្លើង ព្រមានពីការបង្កើនសន្តិសុខ សម្រាប់កិច្ចប្រជុំកំពូលនេះ។

ក្រុងសំខាន់ៗ ក្នុងប្រទេសជប៉ុន ជាទូទៅ មិនមានធុងសំរាម នៅទីសាធារណៈទេ ប៉ុន្តែបុគ្គលិកសន្តិសុខ បានបិទខ្ទប់កន្លែងផ្សេងៗ ដែលយល់ឃើញថា អាចបង្កការគំរាមកំហែង។ ទូដាក់កាក់ ដែលជាធម្មតាមាននៅក្នុងស្ថានីយ៍ជាច្រើន ត្រូវបានឲ្យផ្អាកដំណើរការ នៅស្ថានីយ៍ធំៗ ឆ្ងាយរហូតទៅដល់ទីក្រុងតូក្យូ។

ម៉ាស៊ីនលក់ទំនិញនៅលើជម្រករង់ចាំរថភ្លើងក្រោមដី ក៏ត្រូវបានដកតំណចរន្តឌុយចេញ និងបិទជិតស្រោបដោយក្រដាសកាសែត រួមជាមួយនឹងស្លាកសរសេរអក្សរសូមអភ័យទោស ដែលព្រមានថា ម៉ាស៊ីនទាំងនេះ នឹងមិនអាចប្រើបាននោះទេ ក្នុងអំឡុងពេលកិច្ចប្រជុំកំពូល សម្រាប់ហេតុផលសុវត្ថិភាព។

យោងតាមប្រព័ន្ធផ្សព្វផ្សាយ ក្នុងស្រុកបានឲ្យដឹងថា សាលារៀនជាច្រើន និងស្ថាប័នផ្សេងៗទៀត បានជ្រើសរើសបិទទ្វារ ក្នុងអំឡុងពេលកិច្ចប្រជុំកំពូល។

មេដឹកនាំមកពីប្រទេសសមាជិក G7 ជប៉ុន សហរដ្ឋអាមេរិក កាណាដា អង់គ្លេស បារាំង អាល្លឺម៉ង់ អ៊ីតាលី និងសហភាពអឺរ៉ុប នឹងត្រូវបានចូលរួមដោយភ្ញៀវកិត្តិយស រួមមានប្រធានាធិបតីប្រេស៊ីល លោក Luiz Inacio Lula da Silva និងនាយករដ្ឋមន្ត្រីឥណ្ឌា លោក Narendra Modi៕