ព្រះសីហនុ ៖ ឧត្តមសេនីយ៍ឯក ហ៊ុន ម៉ានិត មេបញ្ជាការរងកងទ័ពជើងគោក បានបញ្ជាក់ថា កន្លងមកមូលដ្ឋាន​សមុទ្ររាម បានរងការវាយប្រហារ និងចោទប្រកាន់ពីខាងក្រៅពាក់ព័ន្ធការធ្វើទំនើបកម្មរបស់ខ្លួន។ ឧត្តមសេនីយ៍ឯក ហ៊ុន ម៉ានិត បានបញ្ជាក់បែបនេះក្នុងឱកាសចុះសួរសុខទុក្ខ និងពាំនាំអាវភ្លៀង និងអំណោយរបស់សម្តេចតេជោ ហ៊ុន សែន នាយករដ្ឋមន្ត្រី និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ចែកជូនដល់កងទ័ពជើងទឹក និងកងកម្លាំង​ឈរជើង​នៅរាម កាលពីថ្ងៃទី១៧ ខែឧសភានេះ។

លោកឧត្តមសេនីយ៍ឯក បានថ្លែងថា កន្លងមកមូលដ្ឋានសមុទ្ររាម បានរងការវាយប្រហារ និងចោទប្រកាន់​ពីខាងក្រៅ ពាក់ព័ន្ធការធ្វើទំនើបកម្មរបស់ខ្លួន។ សម្តេចតេជោ សម្តេចពិជ័យសេនា ទៀ បាញ់ និងឯកឧត្តមប្រាក់ សុខុន បាន​បកស្រាយ និងពន្យល់ជាច្រើនដង អំពីហេតុផល និងគោលបំណងរបស់កម្ពុជា លើបញ្ហានេះ។

លោកឧត្តមសេនីយ៍ឯកបញ្ជាក់ថា៖«គោលបំណងរបស់យើង គឺការធ្វើទំនើបកម្មកងទ័ព មិនថាជើងទឹក ជើងអាកាស ឬ ជើងគោក ដើម្បីពង្រឹងសមត្ថភាពកងទ័ព និងឃឿនការពារជាតិកម្ពុជា ធានាការពារសន្តិសុខ ទាំងក្នុងប្រទេស និងតំបន់។​យើងគ្មានគោលបំណងអ្វីផ្សេង ដូចការចោទប្រកាន់ពីខាងក្រៅទេ។ ថ្នាក់ដឹកនាំ និងរាជរដ្ឋាភិបាល បានកំពុង​ធ្វើការកំណែទម្រង់លើគ្រប់វិស័យ ដើម្បីធានាដល់ផលប្រយោជន៍ជាតិ និងប្រជាជន ហើយជាពិសេសការ​ធ្វើទំនើបកម្ម​កងទ័ព គឺស្របតាមគោលនយោបាយការពារជាតិរបស់កម្ពុជា»។

ក្នុងឱកាសនេះលោកឧត្តមសេនីយ៍ឯក បានថ្លែងអំណរគុណដល់កងទ័ពទាំងអស់ ដែលបានខិតខំបំពេញការងារ ការពារជាតិមាតុភូមិ ចូលរួមសកម្មភាពសង្គម ជាពិសេសបានបង្កើតភាពជោគជ័យជាប្រវត្តិសាស្រ្ត ក្នុងយុទ្ធនាការ​ប្រយុទ្ធប្រឆាំងជំងឺកូវីដ និងបានចូលរួមចាក់វ៉ាក់សាំង ជូនប្រជាជនបង្កើតភាពសុំាក្នុងសហគមន៍។ មុនលេចឡើងនូវយុទ្ធនាការចាក់វ៉ាក់សាំងនេះ សម្តេចពិជ័យសេនា បានរាយការណ៍ជូនសម្តេចតេជោ អំពីលទ្ធផល និងប្រសិទ្ធភាព ក្រោយសម្តេចពិជ័យ បានចាក់វ៉ាក់សាំងសាកល្បងរួចហើយ នេះបានបង្ហាញពីការលះបង់​របស់ថ្នាក់​ដឹកនាំ ដើម្បីសុខទុក្ខរបស់ប្រជាជន។

លោកឧត្តមសេនីយ៍ឯក​ បញ្ជាក់ថា ​កងទ័ព គឺត្រូវស្តាប់បទបញ្ជាថ្នាក់លើ ហើយត្រូវខំប្រឹងប្រែងសម្រេចឱ្យ​បានជោគជ័យ​នូវកិច្ចការ ដែលប្រគល់ជូន។ កងទ័ពអព្យាក្រឹតជាមួយគណបក្សនយោបាយ តែមិនអព្យាក្រឹតជាមួយរាជរដ្ឋាភិបាល ដាច់ខាតការពារសន្តិភាព ការពាររាជរដ្ឋាភិបាល៕ ដោយ ៖ ដារ៉ា