អាមេរិក៖ ក្រុមហ៊ុនផ្ដល់សេវាកម្សាន្ត Walt Disney Co នឹងលុបចោលគម្រោងបង្កើតសាខាដែលមានទំហំទឹកប្រាក់ជិត១ពាន់លានដុល្លារអាមេរិក នៅក្នុងរដ្ឋ Florida និង ខាតបង់ការងារជាង២.០០០កន្លែង សម្រាប់រដ្ឋនេះ។

ប្រធានគ្រប់គ្រងសួនកម្សាន្ត Disney Parks លោកJosh D'Amaro បានប្រាប់បុគ្គលិកតាមសារអេឡិចត្រូនិក កាលពីថ្ងៃព្រហស្បតិ៍ ថា ក្រុមហ៊ុននេះ បានសម្រេចចិត្តមិនបន្តគម្រោងសាងសង់សាខា នៅក្នុងទីក្រុង Orlando នៃរដ្ឋ Florida ដោយសារការដឹកនាំថ្មី និងការផ្លាស់ប្តូរលក្ខខណ្ឌអាជីវកម្ម។  

សេចក្ដីប្រកាសនេះ បានធ្វើឡើងមួយសប្ដាហ៍ បន្ទាប់ពីអគ្គនាយកក្រុមហ៊ុន Disney លោក Bob Iger បាននិយាយថា ជម្លោះដែលនៅតែបន្តជាមួយអភិបាលរដ្ឋ Florida លោក Ron DeSantis បានលើកជាសំណួរអំពីការវិនិយោគដែលនៅតែបន្តនៅទីនោះ។ក្នុងសន្និសីទព័ត៌មានតាមទូរស័ព្ទជាមួយក្រុមអ្នកវិភាគ លោក Iger បាននិយាយថា សកម្មភាពធ្វើឡើងដោយលោក DeSantis និងក្រុមតំណាងរាស្ត្រមកពីគណបក្សសាធារណរដ្ឋ បានដាក់សម្ពាធប្រឆាំងនឹងក្រុមហ៊ុន Disney ជាយុទ្ធនាការសងសឹករដ្ឋាភិបាលប៉ុណ្ណោះ។ 

កាលពីឆ្នាំមុន លោក DeSantis បានចុះហត្ថលេខាលើសេចក្ដីស្នើច្បាប់មួយដើម្បីដកសិទ្ធិស្វ័យគ្រប់គ្រងរបស់ក្រុមហ៊ុនលើទ្រព្យសម្បត្តិដែលមានផ្ទៃដីជាង៤០ម៉ាយល៍ក្រឡា ជិតទីក្រុង Orlando បន្ទាប់ពីអតីតអគ្គនាយកក្រុមហ៊ុន Disney លោក Bob Chapek បានសន្យាជួយកែប្រែច្បាប់របស់រដ្ឋមួយដែលហាមប្រាមការពិភាក្សាពីការចង្អុលបង្ហាញទិសដៅផ្លូវភេទ និងការកំណត់អត្តសញ្ញាណភេទនៅតាមសាលារៀន។ 

ក្នុងសន្និសីទសារព័ត៌មាតាមទូរសព័ទ្ធកាលពីសប្ដាហ៍មុន លោក Iger បានសួរចំៗថា តើរដ្ឋនេះ ចង់ឲ្យយើងវិនិយោគបន្ថែមទៀត ជួយមនុស្សបន្ថែមទៀត និងបង់ពន្ធបន្ថែមទៀតឬ ក៏អត់? ៕