ភ្នំពេញ៖ ក្រុមកីឡាករ អត្តពលកម្មមានពិការភាព បង្កើនការហ្វឹកហាត់ដោយគ្មានការឈប់សម្រាក ក្នុងគោលដៅសំខាន់ គឺការពារមេដាយមាស ដែលខ្លួនធ្លាប់ដណ្ដើមបាន។ ​នេះជាការលើកឡើង ស្របពេលដែលព្រឹត្តិការណ៍ អាស៊ានប៉ារ៉ាហ្គេមចូលមកដល់នៅខែក្រោយនេះ។

ក្រោយព្រឹត្តិការណ៍ស៊ីហ្គេមបានបិទបញ្ចប់ កម្ពុជានឹងធ្វើជាម្ចាស់ផ្ទះ រៀបព្រឹត្តិការណ៍ អាស៊ាន​ប៉ារ៉ាហ្គេម។ ព្រឹត្តិការណ៍នេះ គឺនឹងចាប់ផ្ដើមនៅដើមខែក្រោយ ចាប់ពីថ្ងៃទី ៣ រហូត​ដល់ថ្ងៃទី ៩មិថុនា ដោយមាន អត្តពលិកមានពិការភាព គណៈប្រតិភូ ក៏ដូចជាមន្រ្តីបច្ចេកទេស​ប្រមាណ ៣៥០០នាក់។ នេះជាការលើកឡើងរបស់ ​អគ្គលេខាធិការ គណៈកម្មាធិការជាតិប៉ារ៉ាឡាំពិក។

ស្របពេលការប្រកួតកាន់តែខិតចូលមកដល់ គ្រប់អត្តពលិកមានពិការភាពទាំងអស់សុទ្ធតែបង្កើន​ការ​ហ្វឹកហាត់រៀងខ្លួន។

ក្រុមកីឡាករប្រណាំងរទេះ ជាប្រភេទកីឡាមានសក្ដានុពលសម្រាប់កម្ពុជា ដោយធ្លាប់ដណ្ដើម​បាន​ទាំងមេដាយមាស ប្រាក់ សំរឹទ្ធ បច្ចុប្បន្នក៏ហ្វឹកហាត់ដោយគ្មានការឈប់សម្រាកផងដែរ។ ពួកគេបានដាក់គោលដៅ ​គឺការពារមេដាយមាស​ ដែលខ្លួនធ្លាប់ទទួលឱ្យបាន សម្រាប់ការធ្វើ​ជាម្ចាស់​ផ្ទះ អាស៊ានប៉ារ៉ាហ្គេមខាងមុខនេះ។

ព្រឹត្តិការណ៍អាស៊ានប៉ារ៉ាហ្គេម ដែលកម្ពុជាធ្វើជាម្ចាស់ផ្ទះជាលើកដំបូងដែរនេះ គឺមានការប្រកួត​ទទួល​បានមេដាយចំនួន ១៣ប្រភេទ និងមាន ១ប្រភេទកីឡាជាការសម្ដែង។ សម្រាប់ការធ្វើជាម្ចាស់​ផ្ទះនេះ ឯកឧត្តម យី វាសនា អគ្គលេខាធិការ គណៈកម្មាធិការជាតិប៉ារ៉ាឡាំពិក​ បានដាក់ក្ដីរំពឹងថា កម្ពុជានឹងទទួលបានមេដាយទាំងមាស​ ប្រាក់ សំរឹទ្ធ ច្រើនទ្វេដង ពីការចេញទៅប្រកួតនៅ​ឥណ្ឌូនេស៊ី។

ការប្រកួត អាស៊ានប៉ារ៉ាហ្គេមខាងមុខនេះ កម្ពុជាមានកីឡាករ កីឡាការិនីចូលរួមប្រកួតសរុបជាង ២៣០រូប។ ចំពោះអត្តពលិក គណៈប្រតិភូ ក៏ដូចជា មន្រ្តីបច្ចេកទេសអន្តរជាតិ ដែលនឹងចូលរួមវិញ គឺមានចំនួនប្រមាណ ៣៥០០នាក់។ ការរៀបចំព្រឹត្តិការណ៍ ​អាស៊ានប៉ារ៉ាហ្គេម គឺរាជរដ្ឋាភិបាល​កម្ពុជា ផ្ដល់ជូនគ្រប់យ៉ាងដូចទៅនឹងអ្វីដែល រាជរដ្ឋាភិបាលផ្ដល់ជូន ក្នុងព្រឹត្តិការណ៍ស៊ីហ្គេមដែរ៕ អត្ថបទ៖ គឹមហុក