ការផ្គត់ផ្គង់ និងលំហូរចូលអាវុធទៅកាន់ភាគីសង្រ្គាមទាំង២នៅអ៊ុយក្រែន បានស្ថិតលើរបៀបវារៈនៅក្នុងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ(UN) ។  

ក្រុមអ្នកតំណាងក្រុមប្រឹក្សា បានលើកដៃចង្អុរភាគីដែលទទួលខុសត្រូវជម្លោះនៅតែបន្ត ស្របពេលដែលតំណាងរងជាន់ខ្ពស់ទទួលបន្ទុកកិច្ចការដកហូតអាវុធ លោក Adedeji Ebo បានផ្តល់ព័ត៌មានវិវត្តន៍ចុងក្រោយលើចំនួនគ្រោះថ្នាក់ជនស៊ីវិលយ៉ាងហោច ២៣.៨២១នាក់ ចាប់តាំងពីរុស្ស៊ី បើកការវាយលុកទ្រង់ទ្រាយធំកាលពីខែកុម្ភៈ ឆ្នាំ ២០២២ទៅលើប្រទេសអ៊ុយក្រែន ។  

កិច្ចប្រជុំក្រុមប្រឹក្សាសន្តិសុខ UN បានធ្វើឡើង ស្របពេលមានកញ្ចប់ទណ្ឌកម្មថ្មីប្រកាសឡើងដោយសហរដ្ឋអាមេរិក និងប្រទេសផ្សេងទៀតនៃក្រុមប្រទេសមានឧស្សាហកម្មលូតលាស់ G7 ។  

នៅមុនកិច្ចប្រជុំកំពូលក្រុមប្រទេស G7 នៅជប៉ុន មន្រ្តីមួយរូបរបស់សហរដ្ឋអាមេរិក បាននិយាយថា កិច្ចខិតខំចុងក្រោយរបស់ G7 គឺមានគោលដៅបង្អាក់សមត្ថភាពរុស្ស៊ីទទួលបានសម្ភារៈសឹកដែលពួកគេត្រូវការសម្រាប់សមរភូមិប្រយុទ្ធ ។  

មន្រ្តីជាន់ខ្ពស់ការពារជាតិអាមរិករូបនោះ និយាយប្រាប់ទីភ្នាក់ងារព័ត៌មានរ៉យទ័រថា សភាសហរដ្ឋអាមេរិក ត្រូវបានគេជូនដំណឹងកាលពីថ្ងៃព្រហស្បតិ៍ពីកំហុសគណនេយ្យ ដែលនាំឲ្យមន្ទីរបច្ចកោណ ប៉ាន់ស្មានលើសតម្លៃគ្រាប់រំសេវ មីស៊ីល និងគ្រឿងយុទ្ធោបករណ៍ផ្សេងទៀត ដែលត្រូវបានបញ្ជូនទៅកាន់អ៊ុយក្រែន មានចំនួនប្រហែល ៣ពាន់លានដុល្លារ ៕