កាលពីថ្ងៃព្រហស្បតិ៍ម្សិលមិញ នាវាកងទ័ពជើងទឹកឥណ្ឌា ៣គ្រឿង បានធ្វើដំណើរទៅដល់ទីក្រុងយ៉ង់ហ្គោនជាមួយនឹងជំនួយសង្រ្គោះបន្ទាន់សម្រាប់ប្រជាពលរដ្ឋដែលរងផលប៉ះពាល់ដោយសារព្យុះស៊ីក្លូន Mocha ។ 

 ក្រោមប្រតិបត្តិការ Karuna នាវាកងទ័ពជើងទឹកឥណ្ឌា 'Shivalik', 'Kamorta' និង Savitri' បានដឹកសម្ភារចាំបាច់ដូចជាស្បៀងអាហារ ឱសថ ម៉ាស៊ីនបូមទឹក ម៉ាស៊ីនភ្លើងអាចយួរបាន សម្លៀកបំពាក់ និងសម្ភារអនាម័យផ្សេងទៀត ។ 

 រដ្ឋមន្រ្តីការបរទេសឥណ្ឌាលោក Subhramanyam Jaishankar និយាយនៅលើបណ្តាញព័ត៌មានសង្គម Twitterថា នាវាទី ៤ នឹងធ្វើដំណើរទៅដល់ទីក្រុងយ៉ង់ហ្គោននៅថ្ងៃសុក្រនេះ ។ 

 គួរឲ្យដឹងថា មនុស្សរាប់រយនាក់ រួមទាំងជនមូស្លីមរ៉ូហ៊ីងយ៉ា ត្រូវបានគេសង្ស័យថាស្លាប់ ក្រោយព្យុះស៊ីក្លូន Mocha បោកបក់ទៅលើប្រទេសមីយ៉ាន់ម៉ាកាលពីចុងសប្តាហ៍កន្លងទៅ ៕