​ប្រធានាធិបតី​កូរ៉េខាងត្បូង​លោក Yoon Suk Yeol និយាយ​កាលពី​ថ្ងៃអាទិត្យ ស្រប​ពេលដែល​រូបលោក​ជួបពិភាក្សា​ការងារ​ជាមួយ​អធិការ​ប​តិ​អាល្លឺម៉ង់​លោក Olaf Scholz នៅ​ទីក្រុង​សេ​អ៊ូ​ល​ថា កូរ៉េខាងត្បូង និង​អាល្លឺម៉ង់ នឹង​ចុះហត្ថលេខា​លើ​កិច្ចព្រមព្រៀង​ដែលមាន​គោលដៅ​ការពារ​ការសម្ងាត់​យោធា ដើម្បី​ពង្រឹង​កិច្ចសហប្រតិបត្តិការ​ការពា​រ​ជាតិ។

​លោក Yoon បាន​និយាយ​នៅក្នុង​សន្និសីទ​សារព័ត៌មាន​រួមគ្នា​ជាមួយ​លោក Scholz ថា កិច្ចព្រមព្រៀង​ព័ត៌មាន​យោធា នឹង​ជួយ​ឲ្យ​ប្រតិបត្តិការ​យ៉ាង​រលូន​លើ​ខ្សែសង្វាក់​ផ្គត់ផ្គង់​ឧស្សាហកម្ម​ការពារជាតិ។

​កូរ៉េខាងត្បូង​ដែល​កាលពីពេល​ថ្មីៗ​នេះ បាន​ស្វែងរក​កិច្ចព្រមព្រៀង​ចែករំលែក​ព័ត៌មាន​ស្រដៀង​គ្នា​ជាមួយ​កាណាដា​នោះ បាន​ងាក​មក​ពង្រឹង​ស្សា​ហ​កម្ម​ការពារជាតិ ស្របពេល​តម្រូវ​ការកើនឡើង​ដោយសារ​សង្គ្រាម​នៅ​អ៊ុយ​ក្រែ​ន និង​ភាព​តានតឹង​សកលលោក​ផ្សេងទៀត ប៉ុន្តែ​មកទល់នឹង​ពេលនេះ ពួកគេ​បដិសេធន៍​ពុំ​ផ្តល់​អាវុធ​ដល់ទី​ក្រុង​គី​វ​នោះឡើយ។

​ពាក់ព័ន្ធ​នឹង​បញ្ហា​របស់​កូរ៉េខាងជើង​វិញ លោក Scholz​ដែល​កំពុង​បំពេញ​ទស្សនកិច្ច​នៅ​កូរ៉េខាងត្បូង បន្ទាប់ពី​ចូលរួម​កិច្ចប្រជុំ​កំពូល​ក្រុម​ប្រទេស​មាន​ឧស្សាហកម្ម​លូតលាស់ G7​នៅ​ទីក្រុង Hiroshima ប្រទេស​ជប៉ុន បាន​ថ្កោលទោស​ការបាញ់​សាកល្បង​មី​ស៊ី​ល​របស់​ទីក្រុង​ព្យុងយ៉ាង។

​លោក​បាន​និយាយ​នៅក្នុង​សន្និសីទ​សារព័ត៌មាន​រួមគ្នា​ជាមួយ​លោក Yoon ថា ការបាញ់​មី​ស៊ី​ល​បាលី​ស្ទិ​កដោយ​កូរ៉េខាងជើង មិន​ត្រឹមតែ​បំពាន​លើ​ច្បាប់​អន្តរជាតិ​ប៉ុណ្ណោះ​ទេ តែ​ពួកគេ​បានដាក់​បន្ទុក​លើ​ពលរដ្ឋ​កូរ៉េ ជប៉ុន និង​ប្រជាពលរដ្ឋ​ទូទាំង​តំបន់​ផងដែរ។ អាល្លឺម៉ង សូម​ធ្វើការ​ថ្កោលទោស​ទាំងស្រុង​ចំពោះ​សកម្មភាព​គ្មាន​ទំនួល​ខុសត្រូវ​បែបនេះ៕​