ប្រធានាធិបតីអាមេរិក លោកចូ បៃដិន (Joe Biden) កាលពីថ្ងៃអាទិត្យ បាននិយាយថា ក្រុមប្រទេសទាំងទាំង៧ បានយល់ព្រមលើវិធីសាស្ត្ររួបរួមមួយ ចំពោះប្រទេសចិន ដែលបានអំពាវនាវឲ្យធ្វើពិពិធកម្មខ្សែសង្វាក់ផ្គត់ផ្គង់ ដើម្បីកាត់បន្ថយការពឹងផ្អែកលើប្រទេសមួយនេះ ដោយបង្ហើបថា រូបលោកអាចនិយាយជាមួយប្រធានាធិបតីចិន ក្នុងពេលឆាប់ៗនេះ។
លោក Biden បានប្រាប់សន្និសីទសារព័ត៌មានមួយ បន្ទាប់ពីកិច្ចប្រជុំកំពូលរយៈពេលបីថ្ងៃ ជាមួយមេដឹកនាំប្រទេសមានឧស្សាហកម្មលូតលាស់ទាំង ៧ (G7) ថា៖ «យើងមិនសម្លឹងមើលដល់ការញែកខ្លួនចេញពីប្រទេសចិននោះទេ។ យើងកំពុងស្វែងរកការកាត់បន្ថយហានិភ័យ និងធ្វើពិពិធកម្មទំនាក់ទំនងរបស់យើងជាមួយប្រទេសចិន។ លោកប្រធានាធិបតីបានបន្ថែមថា ប្រទេស G7 មានការរួបរួមជាងពេលណាៗទាំងអស់ ក្នុងលក្ខខណ្ឌនៃ «ការទប់ទល់នឹងការបង្ខិតបង្ខំផ្នែកសេដ្ឋកិច្ចរួមគ្នា និងប្រឆាំងនឹងការអនុវត្តដ៏គ្រោះថ្នាក់ ដែលធ្វើឲ្យប៉ះពាល់ដល់អ្នកធ្វើការរបស់យើង»។
មេដឹកនាំ G7 បានគូសបញ្ជាក់អំពីវិធីសាស្ត្ររួមមួយ «ដើម្បីកាត់បន្ថយហានិភ័យ មិនមែនជាការកាត់ផ្តាច់ពីការការចូលរួមផ្នែកសេដ្ឋកិច្ចជាមួយប្រទេសចិននោះទេ នៅក្នុងសេចក្តីថ្លែងការណ៍មួយ កាលពីថ្ងៃសៅរ៍ ដែលជំរុញឲ្យស្ថានទូតចិនប្រចាំប្រទេសជប៉ុន បានជំរុញឲ្យក្រុមប្រទេស G7 បញ្ឈប់នូវការបង្កើតការប្រឈមដាក់គ្នា និងការបែកបាក់គ្នា។
ទោះបីជាមានប្រតិកម្មនេះក៏ដោយ ក៏លោកបៃដិន (Biden) បាននិយាយថា លោករំពឹងថា នឹមានចំណុចត្រូវរ៉ូវគ្នាក្នុងទំនាក់ទំនងដ៏ស្រអាប់ជាមួយប្រទេសចិន «ក្នុងរយៈពេលដ៏ខ្លី» បន្ទាប់ពីភាពតានតឹង ដែលបណ្តាលមកពីឧប្បត្តិហេតុមួយ កាលពីដើមឆ្នាំនេះ នៅពេលដែលសហរដ្ឋអាមេរិកបាន បាញ់ទម្លាក់បាល់ឡុងចារកម្មរបស់ចិន ដែលបានហោះពីលើទីតាំងយោធាដែលជាចំណុចដ៏រសើបនោះ។
លោក Biden បានលើកឡើងថា៖ «យើងគួរតែមានបណ្តាញទូរស័ព្ទបន្ទាន់បើកចំហ»។ លោកបានបញ្ជាក់បន្ថែមថា លោកបានយល់ព្រមជាមួយប្រធានាធិបតីចិនលោក ស៊ី ជីងភីង (Xi Jinping) ក្នុងអំឡុងពេលកិច្ចប្រជុំរបស់ប្រទេសមានសេដ្ឋកិច្ចលូតលាស់ទាំង២០ (G20) នៅកោះបាលី ប្រទេសឥណ្ឌូនេស៊ី កាលពីឆ្នាំមុន ដើម្បីរក្សាការទំនាក់ទំនងបើកចំហ ប៉ុន្តែអ្វីគ្រប់យ៉ាងបានផ្លាស់ប្តូរបន្ទាប់ពី «បាល់ឡុងដ៏ផ្ដេសផ្ដាសនេះ ដែលផ្ទុកបន្ទុកប៉ុនរថយន្តដឹកទំនិញចំនួនពីរ ដែលបម្រើឲ្យឧបករណ៍ចារកម្ម»៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
