​សេចក្តីថ្លែងការណ៍​រប​ស់​ក្រសួងការបរទេស​រប​ស់​ប្រទេស​ចិន កាលពី​ល្ងាច​ថ្ងៃអាទិត្យ បាន​ឲ្យ​ដឹងថា អនុរដ្ឋមន្ត្រី​ការបរទេស​ចិន លោក ស៊ុន វ៉ី​តុង (Sun Weidong) បាន​កោះហៅ​ឯកអគ្គរាជទូត​ជប៉ុន ដើម្បី​បង្ហាញ​ការតវ៉ា​នឹង​ការ​បំផ្លើស​ជុំវិញ​បញ្ហា​ទាក់ទង​នឹង​ប្រទេស​ចិន ក្នុង​កិច្ចប្រជុំ​កំពូល​របស់​ក្រុម​ប្រទេស​មាន​ឧស្សាហកម្ម​លូតលាស់​ទាំង​៧ (G7) នៅ​ចុង​សប្តាហ៍​កន្លងមក​។​

​ប្រមុខ​ដឹកនាំ​នៃ​កិច្ចប្រជុំ​របស់​ប្រទេស​កាន់​លទ្ធិប្រជាធិបតេយ្យ​ឈានមុខ​គេ​របស់​ពិភពលោក នៅ​ទីក្រុង​ហ៊ី​រ៉ូ​ស៊ី​ម៉ា (Hiroshima) របស់​ប្រទេស​ជប៉ុន បាន​សម្តែង​ការព្រួយបារម្ភ​យ៉ាងខ្លាំង​អំពី​ការកើនឡើង​នៃ​ភាព​តានតឹង​នៅក្នុង​សមុទ្រ​ចិន​ខាងកើត និង​ខាងត្បូង ក៏ដូចជា​ការបង្ហាញ​ក​ង្វ​ល់ពី​ស្ថានភាព​សិទ្ធិមនុស្ស នៅក្នុង​ប្រទេស​ចិន រួមទាំង​តំបន់​ទី​បេ​តិ៍ និង​តំបន់​ស៊ីន​ជាំ​ង (Xinjiang) ផងដែរ​។​

​លោក ស៊ុន បាន​និយាយថា ប្រទេស​ជប៉ុន​បានរួម​ដៃ​ជាមួយ​ប្រទេស​ផ្សេងទៀត នៅឯ​កិច្ចប្រជុំ​កំពូល G7 ក្នុង​សកម្មភាព និង​សេចក្តីប្រកាស​រួម ដើម្បី​បង្ខូច​កេ​រិ៍ត​ឈ្មោះ និង​វាយប្រហារ​ប្រទេស​ចិន ដោយ​ជ្រៀត​ជ្រែកចូល​ជ្រៅ​ទៅក្នុង​កិច្ចការ​ផ្ទៃក្នុង​របស់​ប្រទេស​ចិន និង​រំលោភ​លើ​គោលការណ៍​ជា​មូលដ្ឋាន​នៃ​ច្បាប់​អន្តរជាតិ និង​ស្មារតី​នៃ​ឯកសារ​នយោបាយ​ចំនួន​៤ រវាង​ចិន និង​ជប៉ុន ដែល​ការលើកឡើង​នេះ​សំដៅ​ដល់​សេចក្តីថ្លែងការណ៍​រួម​ចិន​-​ជប៉ុន ឆ្នាំ​១៩៧២​។​

​លោក​អនុរដ្ឋមន្ត្រី បាន​ថ្លែងថា សកម្មភាព​របស់​ប្រទេស​ជប៉ុន ធ្វើ​ឲ្យ​អន្តរាយ​ដល់​អធិបតេយ្យភាព សន្តិសុខ និង​ផលប្រយោជន៍​អភិវឌ្ឍន៍​របស់​ចិន និង​ថា​ប្រទេស​ចិន មិន​ពេញចិត្ត​ជាខ្លាំង និង​ប្រឆាំង​ដាច់ខាត​ចំពោះ​ទង្វើ​របស់​ប្រទេស​នេះ​។​

​ប្រទេស​ចិន កាលពី​ថ្ងៃ​សៅរ៍​ចុង​សប្ដាហ៍​កន្លងមក បាន​សម្តែង​ការមិន​ពេញចិត្ត​យ៉ាងខ្លាំង ជាមួយនឹង​សេចក្តីថ្លែងការណ៍​របស់​មេដឹកនាំ G7 ដែលមាន​បំណង​យក​ទីក្រុង​ប៉េកាំង​ជា​បញ្ហា ដោយ​ក្នុងនោះ​រួមទាំង​បញ្ហា​សមុទ្រ​ចិន​ខាងត្បូង សិទ្ធិមនុស្ស និង​ការចោទប្រកាន់ថា បាន​ជ្រៀតជ្រែក​ក្នុង​លទ្ធិប្រជាធិបតេយ្យ​របស់​ខ្លួន​។​

​ប្លុក​នេះ​បានចេញ​សេចក្តីថ្លែងការណ៍​មួយ ដោយ​អំពាវនាវ​ឲ្យ​ប្រទេស​ចិន «​កុំ​ធ្វើ​សកម្មភាព​ជ្រៀតជ្រែក​» និង​សម្តែង​ការបារម្ភ​អំពី​ការរំលោភ​សិទ្ធិមនុស្ស នៅក្នុង​ប្រទេស​ចិន ជាពិសេស​នៅក្នុង​តំបន់​ឆ្ងាយ​ដាច់ស្រយាល​ចុង​ខាងលិច​គឺ​ទី​បេ​តិ៍ និង​តំបន់​ស៊ីន​ជាំ​ង​៕​