កាណាដា៖ ភ្លើងឆេះព្រៃ បានដាលដាលនៅជិតផ្លូវនានា ក្នុងខេត្ត Alberta ប្រទេសកាណាដា កាលពីថ្ងៃចន្ទ កំពុងធ្វើឲ្យស្មុកស្មាញដល់បណ្តាញដឹកជញ្ជូន បន្ទាប់ពីអាជ្ញាធរ បានបិទផ្នែកមួយចំនួននៃផ្លូវ Highway លេខ៤៣ ដ៏សំខាន់។

យោងតាមមន្ត្រីក្នុងតំបន់បានឲ្យដឹងថា ផ្លូវ Highway មួយនេះ ត្រូវបានបិទដោយផ្នែក ជាវិធានការបង្ការជាមុនកាលពីថ្ងៃចន្ទ ខណៈចំហេះព្រៃបានខិតមកជិតផ្លូវ។ 

រហូតមកដល់ពេលនេះ នៅឆ្នាំនេះ ក្រុមគ្រប់គ្រងចំហេះព្រៃនៅខេត្ត Alberta បានឆ្លើយតបទៅនឹងចំហេះព្រៃចំនួន៤៩៦កន្លែង ដែលកំពុងឆេះរាលដាលលើផ្ទៃដីជាង៨៤២.០០០ ហិចតា ដោយប្រៀបធៀបទៅនឹងឆ្នាំ២០២២ មានត្រឹមតែ៤៥៩ហិចតា។

ក្រុមអ្នកពន្លត់អគ្គិភ័យជាង២.៨០០នាក់ មកពីប្រទេសកាណាដា និងសហរដ្ឋអាមេរិក កំពុងទប់ស្កាត់ចំហេះព្រៃដ៏សកម្មចំនួន៩១កន្លែង កាលពីចុងសប្តាហ៍៕