សៀមរាប៖ មន្ត្រីអាជ្ញាធរជាតិអប្សរាបានឲ្យដឹងថា ពួកគេបានត្រៀមខ្លួនជានិច្ចនៅក្នុងការអនុវត្តវិធានសុខាភិបាលដល់ភ្ញៀវទេសចរណ៍ជាតិអន្តរជាតិ ដែលទៅទស្សនារមណីយដ្ឋានអង្គរ ដើម្បីឲ្យពួកគាត់មានសុវត្ថិភាពក្នុងការកាត់បន្ថយការឆ្លងជំងឺកូវីដ១៩។ វិធាននេះ បានធ្វើឡើងចាប់ពីថ្ងៃទី០៧ខែឧសភាតទៅ ដែលចាំបាច់បំផុតក្នុងការធ្វើឲ្យអ្នកទេសចរមានអារម្មណ៍ថា ពួកគេទៅទស្សនាក្នុងតំបន់អង្គរ មានសុវ ត្ថិភាព មិនបារម្ភពីការឆ្លងមេរោគកូវីដ១៩។
លោក ព្រឿង សុខា ដែលជាអ្នកគ្រប់គ្រងសណ្ដាប់ធ្នាប់ទូទៅ នៅតំបន់ប្រាសាទអង្គរវត្ត បានឲ្យដឹងនៅថ្ងៃទី០៧ ខែឧសភាថា ការចូលទស្សនានៅក្នុងប្រាសាទអង្គររបស់អ្នកទេសចរ ត្រូវបានយកចិត្តទុកដាក់ខ្ពស់បំផុត ដោយលោកបញ្ជាក់ថា ចាប់តាំងពីចំណតរថយន្តរហូតដល់ផ្លូវចូល មន្ត្រីដែលមានតួនាទីប្រចាំការ បានណែនាំដល់ភ្ញៀវទេសចរឲ្យគាត់អនុវត្តនូវវិធានការរបស់ក្រសួងសុខាភិបាលឲ្យបានត្រឹមត្រូវ ដូចជាការពាក់ម៉ាស់ ការដើររក្សាគម្លាត សុវត្ថិភាព ព្រមទាំងការរៀបចំអោយមានចំណតររថយន្ដឲ្យបានត្រឹមត្រូវជាដើម។
លោកបន្ដថា ការរៀបចំបែបនេះ ដើម្បីត្រៀមទទួលភ្ញៀវទេសចរណ៍ដែលអា ចនិយាយបានថា ពួកគាត់នឹងសម្រុកទៅទស្សនាក្នុងរណីយដ្ឋានអង្គរ ក្រោយស្ងប់ស្ងាត់ជំងឺកូវីដ១៩ នាពេលដ៍ឆាប់ខាងមុខនេះ។
លោក ភឿង សោភណ្ឌ ប្រធានគ្រប់គ្រងអ្នកទេសចរប្រចាំប្រាសាទអង្គរវត្ដ បានឲ្យដឹងថា នៅច្រកចូលប្រាសាទអង្គរ ថ្នាក់ដឹកនាំនៃអាជ្ញាធរជាតិអប្សរា បានបំពាក់នូវឧបករណ៍វាស់កម្តៅ អាកុល និងម៉ាស់ ដែលនេះគឺជាការគិតគូរដល់សុវត្ថិភាពអ្នកចូលមកកម្សាន្តនៅតាមប្រាសាទបុរាណនានាក្នុងតំបន់អង្គរ។
លោកបន្ដថា ការបំពាក់សម្ភារៈសម្រាប់ពិនិត្យនិងតាមដានសុខភាពភ្ញៀវទេសចរនេះ គឺធ្វើឡើងជាប្រចាំ។ លោកបន្ថែមថា នៅពេលភ្ញៀវទេសចរណ៍ត្រូវបានរកឃើញថា មានសុខភាពមិនប្រក្រតី ពួកគាត់នឹងរាយការណ៍ក៍ដូចជាបញ្ជូនភ្ញៀវដែលមានបញ្ហានោះទៅផ្នែកសុខាភិបាល ក្នុងខេត្ដសៀមរាប បើសិនគាត់មានស្ថានភាពធ្ងន់ធ្ងរ។
អាជ្ញាធរជាតិអប្សរាបានឲ្យដឹងថា ការដាក់វិធានការសុខាភិបាលដែលមានការ បាញ់អាកុល វាស់កម្ដៅ និងស្គែនឃ្យូអ័រកូដនេះ ធ្វើឡើងនៅគ្រប់ប្រាសាសាទ ដែលជាកន្លែងភ្ញៀវទេសចរទៅទស្សនារួមមាន ប្រាសាទអង្គរតូច ប្រាសាទបាយ័ន ប្រាសាទតាព្រហ្ម បន្ទាយស្រី ព្រមទាំងប្រាសាទជាច្រើននៅក្នុងរមណីយដ្ឋានអង្គរ។
រមណីយដ្ឋានអង្គរ បានចាប់ផ្តើមបើកទទួលអ្នកទេសចរឲ្យចូលមកទស្សនាឡើងវិញ កាលពីថ្ងៃទី២៥ ខែមេសា ឆ្នាំ២០២១។
ការបើកឡើងវិញនេះ ធ្វើឡើងបន្ទាប់ពីរមណីយដ្ឋានប្រវត្តិសាស្ត្រមួយនេះ ក៏ដូចជារមណីយដ្ឋានទេសចរណ៍នានានៅទូទាំងប្រទេស ត្រូវបានរាជរដ្ឋាភិបាលសម្រេចបិទអស់មួយរយៈពេល ដោយសារតែការឆ្លងរីករាលដាលនៃជំងឺកូវីដ១៩ ៕អត្ថបទ៖ ឈិត សាវី