គណបក្សឆ្ពោះទៅមុខរបស់ប្រទេសថៃ និងសម្ព័ន្ធគណបក្សនយោបាយចំនួន៧របស់ខ្លួន បានចុះហត្ថលេខាលើអនុស្សរណៈនៃការយោគយល់(MOU) កាលពីថ្ងៃចន្ទដើម្បី​បញ្ជាក់​ពី​កិច្ចព្រមព្រៀង​ទៅវិញទៅមក ដើម្បីជំរុញរបៀបវារៈ២៣ចំណុច នៅពេលដែលរដ្ឋាភិបាលចម្រុះរបស់​ពួកគេ ត្រូវបានបង្កើតឡើង។

អនុស្សរណៈនៃការយោគយល់កើតមានឡើងបន្ទាប់ពីជ័យជម្នះដែលមិនរំពឹងទុក​របស់គណបក្ស​ឆ្ពោះទៅមុខ ក្នុងការបោះឆ្នោតនៅថ្ងៃទី១៤ ខែ ឧសភា មានបំណងបង្កើតមូលដ្ឋាន​គោលមួយ​សម្រាប់​ការបង្កើតរដ្ឋាភិបាលបន្ទាប់របស់ប្រទេសថៃ ​និងកំណត់ពីទិសដៅការងាររួមគ្នា ក្នុងចំណោមគណបក្សសម្ព័ន្ធមានសមាជិកចំនួន៨។

មេដឹកនាំគណបក្សឆ្ពោះទៅមុខ និងជាបេក្ខជននាយករដ្ឋមន្ត្រីលោក Pita Limjaroenrat បាននិយាយថា​វាជាការចងក្រងរបៀបវារៈទាំងឡាយ ដែលយើងបានព្រមព្រៀងគ្នា ហើយ​បានត្រៀមខ្លួនដើម្បីនាំយកនាពេលខាងមុខតាមរយៈយន្តការសភា និងរដ្ឋាភិបាល។ វាបានបង្ហាញផងដែរថា ការទទួលខុសត្រូវ ត្រូវបានចែករំលែកដោយគណបក្សទាំងអស់ដែលនឹង​បង្កើតរដ្ឋាភិបាលរួមគ្នា។ ក្នុងចំណោមបេសកកម្មសំខាន់ៗគឺការព្រាងរដ្ឋធម្មនុញ្ញថ្មី ផ្តល់​ភាពស្របច្បាប់​អាពាហ៍ពិពាហ៍​ភេទដូចគ្នា ការដាក់បញ្ចូលកញ្ឆាក្នុងបញ្ជីសារធាតុត្រូវហាមប្រាម និងការជ្រើសទាហានដោយបង្ខំត្រូវដាក់ជំនួសដោយការជ្រើសរើសដោយស្ម័គ្រចិត្តអំឡុងពេលសន្តិភាព។

លោក Pita និយាយថា គ្រប់គណបក្សទាំងអស់ បានព្រមព្រៀងថា រាល់បេសកកម្មទាំងអស់ រដ្ឋាភិបាល ​ដែលនឹងនាំយកមកនៅពេលខាងមុខ​ មិនត្រូវប៉ះពាល់ដល់ស្ថានភាពរដ្ឋ ស្ថិតនៅ​ក្រោមរបបរាជាធិបតេយ្យអាស្រ័យរដ្ឋធម្មនុញ្ញ ឬស្ថានភាពរាជាធិបតេយ្យដែលពុំអាចបំពានបាន។

បច្ចុប្បន្នក្រុមចម្រុះរួមមានគណបក្សឆ្ពោះទៅមុខ ភឿថៃ ប្រះឆាឆាត គណបក្សថៃសេរី គណបក្សថៃសាងថៃ គណបក្សយុត្តិធម៌ គណបក្សកម្លាំងសង្គមថ្មី និងគណបក្សភើថៃរួមផ្លាំង(រួមកម្លាំងដើម្បីថៃ)។