​អ៊ីស្រាអែល បាន​ចោទប្រកាន់​កងកម្លាំង​ឆ្មាំ​បដិវត្តន៍​អ៊ីរ៉ង់​(IRGC)​ថា​កំពុង​ប្រែក្លាយ​នាវា​ពាណិជ្ជកម្ម​ទៅជា​កន្លែង​សម្រាប់​បាញ់​មី​ស៊ី​ល យាន​ដ្រូ​ន និង​ជា​កន្លែង​ឈរជើង​របស់​កង​កុំ​ម្មង់​ដូ។

​ការចោទប្រកាន់​របស់​រដ្ឋមន្ត្រី​ការពារជាតិ​អ៊ីស្រាអែល​លោក Yoav Gallant បាន​កើតមានឡើង ស្របពេល​មាន​ភាព​តានតឹង​កើតឡើង​ជាថ្មី រវាង​ប្រទេស​សត្រូវ​ក្នុង​តំបន់​ទាំង​២ ពាក់ព័ន្ធ​នឹង​កិច្ចខិតខំ​ប្រឹងប្រែង​មហិច្ឆតា​នុយក្លេអ៊ែរ​របស់​អ៊ីរ៉ង់ និង​ការគាំទ្រ​របស់​ពួកគេ​ដល់​ក្រុម​ជីវពល​ប៉ា​ឡេ​ស្ទី​ន និង​ក្រុម​ជីវពល​លី​បង់។

​ពេល​បង្ហាញ​រូបភាព​នាវា​អ៊ីរ៉ង់ ៦​គ្រឿង​ដែល​ត្រូវបាន​គេ​រាយការណ៍​ថា​កែច្នៃ​ឡើងវិញ ក្នុងនោះ នាវា​៥​គ្រឿង​ត្រូវបាន​បញ្ចេញ​ឈ្មោះ លោក Gallant និយាយប្រាប់​វេទិកា​សន្តិសុខ Herzliya Conference​ថា មាន​មូលដ្ឋាន​ភេរវកម្ម​បណ្តែត​ទឹក ហើយ​មូលដ្ឋាន​បណ្តែត​ទឹក​មួយ បានធ្វើ​ដំណើរ​ឆ្ពោះទៅកាន់​តំបន់​ឈូង​សមុទ្រ​អា​ដែន កាលពីពេល​ថ្មីៗ​នេះ។

. លោក Gallant បន្តថា នេះ​ធ្វើឡើង​ដោយផ្ទាល់​លើ​ភេរវកម្ម​សមុទ្រ​ដែល​អ៊ីរ៉ង់​បំពាន​នៅ​តំបន់​ឈូង​សមុទ្រ​ពែ​ក្ស និង​សមុទ្រ​អារ៉ាប់។ ពួកគេ​កំពុង​ពង្រីក​សកម្មភាព​របស់​ខ្លួន ដល់​មហាសមុទ្រ​ឥណ្ឌា ហើយ​ក្រោយ​មកដល់​សមុទ្រ​ក្រហម និង​ដល់​សមុទ្រ​មេ​ឌី​ទែ​រ៉ា​ណេ​ផងដែរ។

​ទោះបីជា​យ៉ាងណាក៏ដោយ នៅ​ពុំទាន់​មានការ​ឆ្លើយតប​ភ្លាមៗ​នោះ​ទេពី​អ៊ីរ៉ង់ ជុំវិញ​ការចោទប្រកាន់​របស់​អ៊ីស្រាអែល។ រយៈពេល ២​ឆ្នាំ​ចុង​ក្រោយនេះ គេ​មើលឃើញ​អ៊ីរ៉ង់ និង​អ៊ីស្រាអែល ដាក់​ការស្តីបន្ទោស​លើ​គ្នា​ទៅវិញទៅមក​លើ​ការវាយប្រហារ​ដោយ​ពុំបាន​អះអាង​លើ​នាវា​របស់​ពួក​គ នៅក្នុង​តំបន់​ឈូង​សមុទ្រ​ពែ​ក្ស៕​