បទឈប់បាញ់រយៈពេលប្រាំពីរថ្ងៃ ដែលបានកើតមាន កាលពីថ្ងៃចន្ទ បាននាំមកនូវសភាពស្ងប់ស្ងាត់ដែលរង់ចាំជាយូរមកហើយសម្រាប់ប្រជាជនក្នុងតំបន់ បន្ទាប់ពីមានការប្រយុទ្ធគ្នាយ៉ាងខ្លាំងក្លា នៅក្នុងរដ្ឋធានីនៃប្រទេសស៊ូដង់ ហើយទោះបីជាមានការបាញ់កាំភ្លើងធំម្តងម្កាល នៅតែត្រូវបានលាន់ឮនៅផ្នែកខ្លះនៃភាគខាងជើងទីក្រុងខាទូម (Khartoum) និង Omdurman ក៏ដោយ ក៏ទីក្រុងផ្សេងទៀតរបស់ប្រទេសនេះ ហាក់ដូចជាស្ថិតក្នុងភាពស្ងប់ស្ងាត់ ជាទូទៅ។
កិច្ចព្រមព្រៀងដែលបានចូលជាធរមាន នៅវេលាម៉ោង ២១:៤៥នាទី ម៉ោងនៅទីក្រុងខាទូម កាលពីថ្ងៃចន្ទ ត្រូវបានកើតឡើង នៅឯកិច្ចចរចាពិភាក្សា ក្នុងទីក្រុង Jeddah ប្រទេសអារ៉ាប៊ីសាអ៊ូឌីត កាលពីថ្ងៃសៅរ៍ បន្ទាប់ពីមានការប្រយុទ្ធគ្នាយ៉ាងខ្លាំងក្លារយៈពេល ៥សប្តាហ៍ រវាងកងកម្លាំងប្រដាប់អាវុធស៊ូដង់ (SAR) និងកងកម្លាំងគាំទ្ររហ័សយោធាប៉ារ៉ា (RSF) ដោយអំពាវនាវឲ្យមានការដកកងកម្លាំងចេញពីមន្ទីរពេទ្យ បន្តផ្តល់សេវាសាធារណៈ និងជួយសម្រួលការធ្វើដំណើរប្រកបដោយសុវត្ថិភាពដល់ជំនួយមនុស្សធម៌ និងការផ្ដល់របស់ប្រើប្រាស់ សម្រាប់ប្រជាជន ដែលត្រូវការជំនួយ។
ទោះបីជាស្ថានភាពបានស្ងប់ស្ងាត់បន្តិចក៏ដោយ ក៏ហាងភាគច្រើននៅកណ្តាលក្រុងខាទូម នៅតែបិទទ្វារដដែល។ រថយន្តមួយចំនួន បានធ្វើដំណើរឆ្លងកាត់ផ្លូវតែម្តងម្កាលប៉ុណ្ណោះ ហើយមានមនុស្សតិចណាស់ ដែលអាចឃើញចេញមកខាងក្រៅ។ នៅក្រុង Omdurman ដែលជាទីក្រុងក្បែរខាងរបស់ក្រុងខាទូម ប្រជាពលរដ្ឋបាននិយាយថា ជាលើកដំបូងហើយក្នុងរយៈពេលជាង ៥សប្តាហ៍ ដែលពួកគេអាចមានអារម្មណ៍ទទួលបាននូវភាពស្ងប់ស្ងាត់ដ៏កម្រមាននេះ ប៉ុន្តែឥឡូវនេះអាហារនៅសេសសល់សម្រាប់ពួកគេ គឺស្ទើរតែមិនគ្រប់គ្រាន់ទេ ដែលក្នុងនោះគឺតម្រូវការចាំបាច់ស្ទើរតែពុំមានសោះ ដូចជាទឹកដោះគោនិងស៊ុត។
អ្នកស្រុកម្នាក់ឈ្មោះ Mohamed Abdalgadir បាននិយាយថា បទឈប់បាញ់ចុងក្រោយនេះ អាចមានភាពផុយស្រួយ ប៉ុន្តែពួកគេសង្ឃឹមថា វានឹងឋិតឋេរ ដោយលោកបានប្រាប់ថា៖ «ការប្រយុទ្ធគ្នាបានបំផ្លិចបំផ្លាញទីក្រុងខាទូម (Khartoum) បំផ្លាញហេដ្ឋារចនាសម្ព័ន្ធ និងបណ្តាលឲ្យមានអ្នកស្លាប់ និងរបួសជាច្រើននាក់។ ខ្ញុំសង្ឃឹមថា បទឈប់បាញ់នេះ នឹងមានរយៈពេលវែង ហើយទីក្រុងខាទូម នឹងត្រឡប់ទៅរកស្ថិរភាព និងវិបុលភាពវិញ»៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
