ភ្នំពេញ៖ នាយកដ្ឋានប្រឆាំងបទល្មើសបច្ចេកវិទ្យា នៅព្រឹកថ្ងៃទី២៥ ខែឧសភានេះ បានណែនាំឱ្យមានការប្រុងប្រយ័ត្ន បន្ទាប់ពីបានរកឃើញព័ត៌មានស្តីពីការបោកបញ្ឆោតថ្មី ចំពោះអ្នកដែលគ្រប់គ្រង់ផេកអាជីវកម្ម។

នាយកដ្ឋានប្រឆាំងបទល្មើសបច្ចេកវិទ្យា បញ្ជាក់ថា ក្រមបោកបញ្ឆោត ពួកគេកំពុង​ព្យាយាមប្រើប្រាស់​ឈ្មោះ និងនិមិត្តសញ្ញាស្រដៀងទៅនឹងក្រុម ឬទំព័រផ្សព្វផ្សាយរបស់ក្រុមហ៊ុន Facebook និងបញ្ឆោតឱ្យទាញយកមេរោគរបស់ពួកគេ តាមរយៈការផ្ញើដំណរភ្ជាប់​បោក​បញ្ឆោតក្លែងក្លាយ (Fake Link)។

នាយកដ្ឋានប្រឆាំងបទល្មើសបច្ចេកវិទ្យា បញ្ជាក់ថា៖«បើមិនស្គាល់តំណរភ្ជាប់ (Link) ច្បាស់ទេ សូមកុំចុចពីលើវា ត្រូវលុបចោល ដើម្បីសុវត្ថិភាពលើឧបករណ៍គណនីរបស់អស់លោកអ្នក (ដូចភ្ជាប់ក្នុងរូបភាពខាងក្រោម)»។

នាយកដ្ឋានប្រឆាំងបទល្មើសបច្ចេកវិទ្យាបញ្ជាក់ថា ក្នុងករណីប្រជាជលរដ្ឋបានទទួល​រង​គ្រោះ​ដោយការ​បន្លំដូច​ករណីខាងលើ សូមមកដាក់ពាក្យបណ្តឹង​នៅនាយកដ្ឋានប្រឆាំងបទល្មើស​បច្ចេកវិទ្យា ​នៃអគ្គស្នងការដ្ឋានគរបាលជាតិ ក្រសួងមហាផ្ទៃ៕