ភ្នំពេញ៖ គិតចាប់ពីថ្ងៃទី២៥ ខែមិថុនា ឆ្នាំ២០២០ ដល់ថ្ងៃទី២៤ខែឧសភា ឆ្នាំ២០២៣ រាជរដ្ឋាភិបាល តាមរយៈក្រសួងសង្គមកិច្ច អតីតយុទ្ធជន និងយុវនីតិសម្បទា បានអនុវត្តកម្មវិធីឧបត្ថម្ភសាច់ប្រាក់​ជូនគ្រួសារក្រីក្រ និងងាយរងគ្រោះក្នុង អំឡុងពេលប្រយុទ្ធនឹងជំងឺកូវីដ-១៩ ចំនួន ៣៥ លើក ដោយចំណាយអស់ថវិការដ្ឋអស់ចំនួន ៤.២២៧ ០៤៧ ៤៣១ ០០០ (បួនពាន់ពីររយម្ភៃប្រាំពីរប៊ីលាន សែសិបប្រាំពីរលាន បួនរយសាមសិបមួយពាន់រៀលគត់) ស្មើនឹង ១ ០៥៦.៧៦ លានដុល្លារអាមេរិក។

យោងតាមសេចក្ដីជូនដំណឹងរបស់ក្រសួងសង្គមកិច្ច អតីតយុទ្ធជន និងយុវនីតិសម្បទានាថ្ងៃទី២៤ ខែឧសភា ឆ្នាំ២០២៣នេះ បានបញ្ជាក់ថា កាលពីថ្ងៃទី២៤ ខែមិថុនា ឆ្នាំ២០២០ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសដាក់ឱ្យអនុវត្តជាផ្លូវការនូវកម្មវិធីឧបត្ថម្ភសាច់ប្រាក់​ជូន​គ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ-១៩ ​ហើយក្រសួងសង្គមកិច្ច អតីតយុទ្ធជន​ និងយុវនីតិសម្បទា ក៏បានចាប់ផ្ដើមដំណើរការអនុវត្តកម្មវិធីនៅថ្ងៃទី២៥ ខែមិថុនា ឆ្នាំ២០២០ មកដល់បច្ចុប្បន្នបានចំនួន ១៣ ជុំ មាន ៣៥ លើក រួចមកហើយ។

ក្រសួងសង្គមកិច្ច អតីតយុទ្ធជន ​និងយុវនីតិសម្បទា បានឱ្យដឹងថា សរុបការចំណាយលើការអនុវត្ត​កម្មវិធីចាប់ពីថ្ងៃទី២៥ ​ខែមិថុនា ឆ្នាំ២០២០ ដល់ថ្ងៃទី២៤ ​ខែឧសភា ឆ្នាំ២០២៣ (៣៥លើក) អស់​ថវិការដ្ឋ​ចំនួន ៤.២២៧ ០៤៧ ៤៣១ ០០០ (បួនពាន់ពីររយម្ភៃប្រាំពីរប៊ីលាន ​សែសិបប្រាំពីរលាន បួនរយសាមសិបមួយពាន់រៀលគត់) ស្មើនឹង ១ ០៥៦.៧៦ លានដុល្លារអាមេរិក។

ក្រសួងបញ្ជាក់ថា​ សម្រាប់ការបើកផ្ដល់ប្រាក់ឧបត្ថម្ភជុំទី១៣ ​លើកទី២ ​នឹងចាប់ផ្ដើមពីថ្ងៃទី២៥ ខែឧសភា ឆ្នាំ២០២៣ ​រហូតដល់ថ្ងៃទី២៤ ខែមិថុនា​ ឆ្នាំ២០២៣ ​មានរយៈពេល ៣០ថ្ងៃ ដែលមាន​គ្រួសារ​ទទួលបានការ​ឧបត្ថម្ភ​សរុបជាង ៧០ ម៉ឺនគ្រួសារ៕