ភ្នំពេញ ៖អត្តពលិកជនពិការរបស់កម្ពុជា កំពុងខិតខំបន្តហ្វឹកហាត់សម្រាប់ត្រៀមចូលរួមព្រឹត្តិការណ៍អាស៊ានប៉ារ៉ាហ្គេមនាពេលខាងមុខ ខណៈអត្តពលិកដែលនឹងចូលរួមប្រកួត រួមមានទាំង អត្តពលិកពិការដៃ ពិការជើង រួមទាំងអត្តពលិកដែលពិការភ្នែកទាំងសងខាងផងដែរ។

ការការចុះយកព័ត៌មានផ្ទាល់របស់ក្រុមការងារ BTV ជារៀងរាល់ថ្ងៃ នៅពហុកីឡដ្ឋានជាតិអូឡាំពិក វត្តមានអត្តពលិកមានពិការភាពចាស់ ក្មេងជាច្រើនរូប កំពុងហ្វឹកហាត់ ដើម្បីត្រៀមចូលរួមព្រឹត្តិការណ៍អាស៊ានប៉ារ៉ាហ្គេម។

ក្នុងនោះ កីឡាការិនី យិន សូត ជាកីឡាការិនីរត់ចម្ងាយផ្នែកពិការភ្នែកសងខាងមួយរូប បច្ចុប្បន្នកំពុងខិតខំហ្វឹកហាត់ ដើម្បីបង្កើនសមត្ថភាពឱ្យខ្លាំងក្នុងនាមជាម្ចាស់ផ្ទះព្រឹត្តិការណ៍អាស៊ានប៉ារ៉ាហ្គេម។

យិន សូត លើកឡើងថា ទោះបីនាងមើលមិនឃើញ ហើយតម្រូវឱ្យគ្រូបង្វឹកកាន់ដៃក្នុងពេល​ហ្វឹកហាត់ និងការប្រកួត។ កីឡាការិនី យិន សូត ថា នាងមានភាពជឿជាក់ទោះពីជាមានការលំបាកក្នុងការហ្វឹកហាត់ក៏ដោយ។

នាង បញ្ជាក់ថា ទោះបីពិការភាព នាងនៅតែអាចចូលរួមប្រកួតតំណាងជាតិកម្ពុជា និងប្ដេជ្ញាដណ្ដើមយកមេដាយជូនគ្រួសារ និងជូនសង្គមជាតិថែមទៀតផង។ យិន សូត ក៏បានលើកទឹកចិត្តដល់ជនមានពិការភាពត្រូវមានកម្លាំងចិត្ត មានការតស៊ូ ដើម្បីខ្លួនឯង គ្រួសារ និងសង្គមជាតិ។

កីឡាកររត់ចម្ងាយពិការជើងវ័យជាង ៥០ ឆ្នាំ ពីររូបក៏កំពុងប្រឹងប្រែងហ្វឹកហាត់ដើម្បី​ត្រៀមចូលរួម​ប្រកួតតំណាងឱ្យកម្ពុជាលើវិញ្ញាសាកីឡាកររត់ចម្ងាយ។ កីឡាករវ័យចំណាស់ទាំងពីរ បង្ហាញ​ក្ដីសប្បាយរីករាយជាខ្លាំង នៅពេលមានឱកាសចូលរួមប្រកួតក្នុងព្រឹត្តិការណ៍​ដ៏ធំដែលកម្ពុជាធ្វើជាម្ចាស់ផ្ទះនេះ។

សូមជម្រាបថា ព្រឹត្តិការណ៍អាស៊ានប៉ារ៉ាហ្គេម ដែលកម្ពុជាធ្វើជាម្ចាស់ផ្ទះជាលើកដំបូងនេះ គឺ​នឹងប្រព្រឹត្តិទៅចាប់ពីថ្ងៃទី ៣ មិថុនា ដល់ថ្ងៃទី ៩ មិថុនា ឆ្នាំ២០២៣។​ ព្រឹត្តិការណ៍នេះ គឺមានការ​ប្រកួតលើ ១៤ ប្រភេទកីឡា ក្នុងនោះមាន ១ ប្រភេទកីឡា ជាកីឡាបង្ហាញពុំមានមេដាយនោះទេ៕ អត្ថបទ៖គឹមហុក