លោក Kajsa Ollongren រដ្ឋមន្ត្រីការពារជាតិ ហូឡង់ បាននិយាយកាលពីថ្ងៃពុធនៅក្នុងលិខិតមួយច្បាប់ទៅកាន់សភាថា ប្រទេសហូឡង់ មានបំណងផ្តល់ការបណ្តុះបណ្តាល ដល់​អាកា​ស​យា​និកអ៊ុយក្រែនឲ្យចេះបើកយន្តហោះចម្បាំង F-16 ឲ្យបានកាន់តែឆាប់តាមដែលអាចធ្វើទៅបាន។ លោក Ollongren និយាយថា ការហ្វឹកហាត់​នឹងត្រូវបានសម្រប​សម្រួលជាមួយប្រទេស​ប៊ែលហ្ស៊ិក ដាណឺម៉ាក់ ចក្រភពអង់គ្លេស និងប្រទេសជាច្រើនទៀត ដែលអាចចូលរួម។

កាលពីថ្ងៃអង្គារប្រមុខណាតូ លោក Jens Stoltenberg បាននិយាយថា ការបណ្តុះបណ្តាលដល់អាកាសយានិកអ៊ុយក្រែនប្រើយន្តហោះប្រយុទ្ធ F-16 របស់ប្រទេសលោកខាងលិច នឹង​ពុំ​​ធ្វើ​ឲ្យ​ភាគីណាមួយរបស់ណាតូក្លាយជាភាគីជម្លោះរវាងរុស្ស៊ី និងអ៊ុយក្រែននោះទេ។ ប្រទេសន័រវ៉ែស បាននិយាយ​កាលពីថ្ងៃពុធថា ខ្លួន​នឹង​គាំទ្រកិ​ច្ច​ប្រឹងប្រែង ដើម្បី​បង្រៀន​អាកា​ស​យា​​​និក​អ៊ុយ​ក្រែនដើម្បីប្រើប្រាស់យន្តហោះប្រយុទ្ធ F-16។ ទីភ្នាក់ងារសារព័ត៌មាន RIA បានរាយការណ៍ថា កាលពីមួយថ្ងៃមុននោះ អ្នកការទូតជាន់ខ្ពស់រុស្ស៊ី បាននិ​យាយថា ការ​ផ្ទេរ​យន្ត​​ហោះ​ប្រយុ​ទ្ធ F-16 ដល់អ៊ុយក្រែននឹងបង្កើនបញ្ហារលើតួនាទីរបស់ណាតូនៅក្នុងជម្លោះ ហើយកាលពីពីថ្ងៃពុធ អនុរដ្ឋមន្ត្រីការបរទេសរុស្ស៊ី លោក Sergei Ryabkov បាននិយាយថា យ​ន្ត​ហោះ​ប្រ​ដេញ​F-16 ផលិតដោយសហរដ្ឋអាមេរិកណាមួយ ដែលផ្គត់ផ្គង់ដល់អ៊ុយក្រែន នឹងជាគោលដៅស្របច្បាប់សម្រាប់ទីក្រុងមូស្គូ។

កា​ល​ពីថ្ងៃសុក្រ ប្រធានាធិបតីសហរដ្ឋអាមេរិក លោក​ Joe Biden បានគាំទ្រដល់កម្មវិធីបណ្តុះបណ្តាលសម្រាប់អាកាសយានិកអ៊ុយក្រែនលើយន្តហោះ F-16 ហើយប្រធានាធិបតី​អ៊ុយ​ក្រែ​ន លោក Volodymyr Zelenskiy បាន​ធានា​ដល់​លោក​ Biden ថា យន្តហោះទាំងនេះ នឹងមិនត្រូវបានប្រើប្រាស់ដើម្បីវាយប្រហារគោលដៅ នៅខាងក្នុងទឹក​ដីរបស់រុស្ស៊ី​នោះទេ​។​ប្រ​ទេស​លោកខាងលិចនិយាយថា ខ្លួនមាន​បំណង​ជួយ​អ៊ុយ​​ក្រែ​នវា​យ​ឲ្យរុស្ស៊ីបរាជ័យ ប៉ុន្តែបានទទូចដដែលៗថា ខ្លួនមិនចង់បង្កការប្រឈមដាក់គ្នាដោយផ្ទាល់រវាង សម្ព័ន្ធ​យោធា​ណា​តូ ដែលគាំទ្រដោយសហរដ្ឋអាមេរិក ជាមួយរុស្ស៊ីនោះទេ។